បរទេស៖ លោក Joan Laporta ប្រធានក្លិប Barcelona កាលពីថ្ងៃចន្ទ បានបញ្ចេញព័ត៌មានលម្អិតទាក់ទងនឹងបញ្ហាហិរញ្ញវត្ថុ ដែលបានបង្ខំឲ្យរូបលោកត្រូវចែកផ្លូវជាមួយនឹងតារាឆ្នើម Lionel Messi។
លោក Laporta បានប្រាប់សន្និសីទសារព័ត៌មានដែលមានរយៈពេល២ម៉ោងនាកីឡដ្ឋាន Camp Nou ថា៖ «ស្ថានភាពសេដ្ឋកិច្ច និងហិរញ្ញវត្ថុរបស់ក្លិប ស្ថិតក្នុងភាពដ៏គួរឲ្យព្រួយបារម្ភ ហើយស្ថានភាពហិរញ្ញវត្ថុ គឺពិតជាមិនល្អឡើយ»។ លោកបានបញ្ជាក់ថា Barcelona ជាប់បំណុលរហូតដល់ទៅ១,៣៥ពាន់លានអឺរ៉ូ (ស្មើនឹង១,៦ពាន់លានដុល្លារអាមេរិក) និងត្រូវចំណាយលើប្រាក់ខែកីឡាករដល់ទៅ៦១៧លានអឺរ៉ូ ដែលចំនួននេះគឺច្រើនជាងគូប្រកួតរបស់ខ្លួនរហូតដល់២៥ ទៅ៣០%។ លោកបានឲ្យដឹងថា៖ «យើងទាំងអស់កំពុងតែរឹតបន្តឹងខ្សែក្រវាត់របស់យើង ហើយក្នុងរយៈពេ២ ទៅ៣ឆ្នាំទៀត ហិរញ្ញវត្ថុរបស់ក្លិបនេះ នឹងមានភាពល្អប្រសើរឡើង»។
ទាក់ទងនឹងការចាកចេញរបស់ Messi លោក Laporta បានឲ្យដឹងថា ភាគីទាំង២ បានធ្វើការចរចាគ្នាជាច្រើនលើក ដោយសង្ឃឹមថា អាចទទួលបានផ្លែផ្កា ប៉ុន្តែ មិនបានកើតឡើងឡើយ។ យើងបានព្រមព្រៀងគ្នាទាំងខកចិត្ត»។ លោក Laporta បានទទួលស្គាល់ថា ការចូលរួមរបស់ Messi ជាមួយនឹងក្លិប Paris Saint-Germain កាលពីថ្ងៃសៅរ៍ ក៏ធ្វើឲ្យលោកមានអារម្មណ៍ខកចិត្តដូចអ្នកគាំទ្រដែរ៕
ប្រភពព័ត៌មាន៖ Channel News Asia
