បរទេស៖ លោក Mikel Arteta បានទទួលស្គាល់ថា ការប្រកួតជាមួយនឹងក្រុម Norwich ក្នុងក្របខ័ណ្ឌ Premier League របស់ Arsenal នៅថ្ងៃសៅរ៍ គឺជាការប្រកួតដែលត្រូវតែ «ឈ្នះជាដាច់ខាត» ក្រោយពីការជួបលទ្ធផលដ៏អន់បំផុតនៅដើមរដូវកាលនៃក្របខ័ណ្ឌលីក ក្នុងរយៈពេល៦៧ឆ្នាំមកនេះ។ ក្រុមកាំភ្លើងធំ មិនបានរកគ្រាប់បាល់បញ្ចូលទីលើដៃគូសូម្បីតែ១គ្រាប់ ក្នុងពេលរងបរាជ័យក្រោមស្នាដៃក្រុម Brentford, Chelsea និង Manchester City។
តំណែងរបស់លោក Arteta ក្នុងនាមជាអ្នកចាត់ការទូទៅក៏ស្ថិតក្រោមសម្ពាធផងដែរ ខណៈដែលគ្រូបង្វឹកសញ្ជាតិអេស្ប៉ាញរូបនេះ ត្រូវបានផ្តល់ឱកាសត្រឹមតែ៤ប្រកួតទៀតប៉ុណ្ណោះក្នុងក្របខ័ណ្ឌ Premier League ដើម្បីសង្គ្រោះការងាររបស់លោក។ ការរងបរាជ័យក្នុងលទ្ធផល ៥-០ របស់ក្រុម Arsenal ក្រោមស្នាដៃក្រុម Man City កាលពីខែមុន មានន័យថា ពួកគេបានរងបរាជ័យក្នុងការប្រកួតបើកឆាកទាំង៣លើកនៃក្របខ័ណ្ឌលីកក្នុងរដូវកាលមួយ ជាលើកដំបូង បើគិតចាប់តាំងពីរដូវកាលឆ្នាំ១៩៥៤-១៩៥៥ ហើយអ្វីដែលកាន់តែអាក្រក់ទៅទៀតនោះគឺថា ក្រុមគូប្រជែងក្នុងតំបន់តែមួយរបស់ពួកគេគឺ Tottenham កំពុងតែនាំមុខលើកំពូលតារាង។
លទ្ធផលដ៏ខកចិត្តជាបន្តបន្ទាប់ពី ពិតជាមានភាពផ្ទុយគ្នាស្រឡះទៅនឹងការចំណាយរបស់ក្លិបនៅរដូវកាលនេះ ខណៈដែលពួកគេបានចំណាយប្រាក់ដល់ទៅ១៥០លានផោន (ស្មើនឹង២០៧លានដុល្លារអាមេរិក) ទៅលើកីឡាករថ្មី។ លោក Arteta បានឲ្យដឹងថា៖ «យើងត្រូវតែចាប់ផ្តើមឡើងវិញនៅនេះ ហើយជាការរំពឹងទុក គ្រប់គ្នាវិលរកភាពខ្លាំងវិញ និងចាប់ផ្តើមឈ្នះការប្រកួតកីឡាបាល់ទាត់របស់ពួកគេ៕
ប្រភពព័ត៌មាន៖ Channel News Asia