ក្លិបបាល់ទាត់វិសាខា កាលពីប៉ុន្មានម៉ោងមុននេះ បានប្រកាសតែងតាំងគ្រូជំនួយជនជាតិនីហ្សេរីយ៉ា លោក Akeeb Tunji Ayoyinka ឱ្យធ្វើជាគ្រូបង្គោលស្តីទី និងបន្តដឹកនាំក្រុមមានមូលដ្ឋាននៅកីឡដ្ឋានព្រីនស៍មួយនេះ សម្រាប់ការប្រកួត ដែលនៅសេលសល់ នៃលីគកំពូលកម្ពុជា ព្រមទាំងការប្រកួតពានរង្វាន់សម្តេច ហ៊ុន សែន ឆ្នាំ២០២១។
វិសាខា បានប្រកាសនៅលើផេចហ្វេសប៊ុករបស់ខ្លួន កាលពីប៉ុន្មានម៉ោងមុននេះថា៖«ក្លិបរបស់យើង មានកិត្តិយស សូមប្រកាសតែងតាំងគ្រូជំនួយលោក Akeeb Tunji Ayoyinka ជាគ្រូបង្គោលស្ដីទី ដើម្បីដឹកនាំគ្រប់ការប្រកួតសេសសល់ ក្នុងរដូវកាលឆ្នាំ២០២១ ទាំងពានរង្វាន់មិត្តហ្វូនខេមបូឌានលីគ និងពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៥»។
ការប្រកាសតែងតាំងគ្រូជំនួយលោក Akeeb Tunji Ayoyinka ឱ្យធ្វើជាគ្រូបង្គោលស្ដីទី ដើម្បីដឹកនាំ ក្រុមវិសាខា បន្តនេះ គឺត្រូវបានធ្វើឡើង ត្រឹមរយៈពេល១ថ្ងៃ នៃការប្រកាសចែកផ្លូវជាមួយគ្រូបង្វឹកអៀរឡង់ លោក Curtis Colum Gerard កាលពីថ្ងៃអាទិត្យ គឺបន្ទាប់ពីលោក Colum បានដឹកនាំក្រុមវិសាខា យកឈ្នះក្រុមណាហ្គាវើលដ៍ ១-០ កាលពីថ្ងៃសៅរ៍។
ជុំវិញការចែកផ្លូវជាមួយលោក Curtis Colum Gerard នេះ ក្លិបវិសាខា បានបង្ហោះព័ត៌មានថា៖ «ពួកយើងទាំងអស់គ្នា សូមអរគុណលោកគ្រូ Curtis Colum Gerard សម្រាប់ការខិតខំប្រឹងប្រែងជួយក្លិបរបស់យើងកន្លងមក ។ តាងនាមគ្រួសារបាល់ទាត់ វិសាខា សូមជូនពរលោកគ្រូ Colum ជួបតែសំណាងល្អ និងទទួលបានជោគជ័យ ក្នុងអាជីពនាថ្ងៃអនាគត»។
យ៉ាងណាក៏ដោយ សម្រាប់ការប្រកាសចែកផ្លូវជាមួយគ្រូបង្វឹកលោក Curtis Colum Gerard នេះ បានធ្វើឱ្យមជ្ឈដ្ឋានទូទៅ ជាពិសេសអ្នកគាំទ្រក្រុមវិសាខា ផ្ទាល់ បានកើតជាចម្ងល់ និងមានការភ្ញាក់ផ្អើលខ្លាំង ខណៈគ្រូបង្គោលរូបនេះ កំពុងតែដឹកនាំក្រុមបានយ៉ាងល្អ ដើម្បីឈានទៅរកការប្រជែងយកពាន ជាលើកដំបូង នៅលីគកំពូលកម្ពុជា ជាលើកដំបូង នោះ។
ក្រោមការដឹកនាំរបស់លោក Curtis Colum Gerard ក្រុមវិសាខា បានបញ្ចប់ការប្រកួតជើងទី១ នៃលីកកំពូលកម្ពុជា ដោយមិនស្គាល់ការចាញ់សោះ មុនពេលពួកគេ មកចាញ់ក្រុមបឹងកេត ២-១ វិញ ក្នុងជើងទី២ កាលពីពេលថ្មីៗនេះ ដែលធ្វើឱ្យការប្រកួតទាំង១៤លើករបស់ វិសាខា គឺឈ្នះ៩ ស្មើ៤ ចាញ់១ប្រកួត និងកំពុងឈរនៅលេខ៤ មាន៣១ពិន្ទុ។
ចំណែកក្រុមកពុងឈរនៅលេខ១ ព្រះខ័នរាជស្វាយរៀង និងក្រុមលេខ២ ភ្នំពេញក្រោន មាន៣៤ពិន្ទុស្មើគ្នា ហើយក្រុមបឹងកេត ដែលឈរនៅលេខ៣ មាន៣៣ពិន្ទុ តែក្រុមទាំង៣នេះ ប្រកួតបាន១៥លើកហើយ គឺមានន័យថា លើស វិសាខា ១ប្រកួត ហេតុនេះ វិសាខា កំពុងមានឱកាសពេញដៃ ក្នុងការប្រជែងយកពាន៕