ក្លិបបាល់ទាត់វិសាខា បានបង្ហាញឱ្យអ្នកគាំទ្របាល់ទាត់នៅកម្ពុជា ឃើញកាន់តែច្បាស់ពួកគេ មិនត្រឹមតែមានបំណងត្រឹមការប្រជែងយកពាន នៅក្នុងស្រុកប៉ុណ្ណោះទេ ប៉ុន្តែអ្វីដែលសំខាន់ជាងនេះ គឺការបង្ហាញមុខមាត់បាល់ទាត់កម្ពុជា នៅលើឆាកអន្តរជាតិ ទៅតាមទិសដៅ ដែលប្រធានក្លិបមួយនេះ បានដាក់ចេញ។
ជាមួយនឹងការឈានទៅសម្រេចទិសដៅនេះ ក្លិបវិសាខា មិនត្រឹមតែហ៊ានចំណាយលុយដ៏ច្រើន ក្នុងការនាំយកកីឡាករល្អៗ មកចូលរួមជួយក្រុមប៉ុណ្ណោះទេ ប៉ុន្តែអ្វីដែលកាន់តែធ្វើឱ្យអ្នកគាំទ្រ មានការភ្ញាក់ផ្អើលនោះ គឺ វិសាខា បានបន្តតែងតាំងគ្រូបង្វឹក ដែលមានទេពកោសល្យ និងបទពិសោធ ឱ្យកាន់តែតួនាទីសំខាន់ៗ នៅក្នុងក្លិបរបស់ខ្លួន ជាបន្តបន្ទាប់។
ការនាំយកអតីតគ្រូបង្គោលក្រុមទ័ព លោក ភា សុភ័ក្រ្តា ដែលកំពុងបំពេញតួនាទី ជាគ្រូជំនួយ នៅក្នុងក្រុមជម្រើសជាតិ ឱ្យមកធ្វើជាគ្រូវិភាគ នៅក្នុងក្លិបវិសាខា កាលពីពេលថ្មីៗនេះ វាបានក្លាយជារបត់ថ្មីមួយ សម្រាប់ក្លិបអ្នកមានទ្រព្យមួយនេះ ហើយបន្ថែមលើនេះ វិសាខា កាលពីថ្ងៃទី៦ ខែធ្នូ កន្លងមកនេះ បានប្រកាសតែងតាំងអតីតគ្រូបង្គោលក្រុមណាហ្គាវើលដ៍ លោក មាស ចាន់ណា ឱ្យធ្វើជាអ្នកចាត់ការក្រុម ដែលរឿងនេះ បានធ្វើឱ្យអ្នកគាំទ្រ មានការភ្ញាក់ផ្អើល កាន់តែខ្លាំង។
បន្ថែមទៅលើវត្តមានលោក ភា សុភ័ក្រ្តា និង លោក មាស ចាន់ណា នេះ វិសាខា កាលពីព្រឹកថ្ងៃពុធនេះ បានប្រកាសតែងតាំងគ្រូបង្វឹកជនជាតិកូរ៉េខាងត្បូង លោក Lee Tae Hoon ជាគ្រូបង្គោលថ្មី ជំនួសកៅអីរបស់អតីតគ្រូបង្វឹកចាស់លោក Colum Curtis ដែលក្លិបបានចែកផ្លូវកាលពីថ្មីៗនេះ។
វិសាខា បានប្រកាសពីការតែងតាំងនេះថា៖ «ក្លិបកីឡាបាល់ទាត់វិសាខា មានសេចក្ដីសោមនស្សរីករាយក្រៃលែង ក្នុងការប្រកាសតែងតាំងលោក Lee Tae Hoon ជាគ្រូបង្គោលរបស់យើង ដើម្បីត្រៀមការប្រកួត នារដូវកាលថ្មី ឆ្នាំ២០២២។ សូមស្វាគមន៍ លោកគ្រូ មកកាន់គ្រួសារបាល់ទាត់ វិសាខា»។
ការនាំយកបុគ្គលឆ្នើមៗទាំង៣រូប មករួមគ្នាដឹកនាំក្រុមវិសាខា នារដូវកាលថ្មីនេះ វាបានបង្ហាញឱ្យឃើញថា វិសាខា ពិតជាចង់ទទួលបានជោគជ័យ លើសពីការឈ្នះត្រឹមតំណែងជើងឯក ពានរង្វាន់សម្តេច ហ៊ុន សែន ចំនួន ២ ឆ្នាំជាប់ៗគ្នា កន្លងមកនេះ ហើយអ្វីដែលជាមហិច្ឆតាធំនោះ គឺវិសាខា ចង់លើកមុខមាត់បាល់ទាត់កម្ពុជា តាមរយៈការប្រកួតប្រជែង នៅលើឆាកអន្តរជាតិ ខណៈពេលនេះ វិសាខា កំពុងត្រៀមខ្លួនប្រកួតពានរង្វាន់កម្រិតទី២ ប្រចាំទ្វីបអាស៊ី AFC Cup 2022 ផងដែរ៕