ក្លិបអ្នកមានទ្រព្យ វិសាខា មិនបណ្តោយឱ្យខ្សែការពារដ៏រឹងមាំរបស់អាហ្រ្វិកខាងត្បូង KHAN MOHAMMED FAEEZ ចាកចេញនោះទេ គឺក្រុមមានមូលដ្ឋាននៅកីឡដ្ឋានព្រីនស៍មួយនេះ បានចងជើងអ្នកការពារម្នាក់នេះទុក តាមរយៈការបន្តកុងត្រាថ្មី រហូតដល់ចប់ឆ្នាំ២០២២។
«ពួកយើង ពិតជារីករាយ ក្នុងការប្រកាសបន្ដកិច្ចសន្យា ជាមួយខ្សែការពារអាហ្វ្រិកខាងត្បូង KHAN MOHAMMED FAEEZ រហូតដល់ឆ្នាំ ២០២២»។ នេះជាសេចក្តីប្រកាសរបស់ក្លិបវិសាខា កាលពីថ្ងៃម្សិលមិញ ជុំវិញការរក្សាទុកខ្សែប្រយុទ្ធរបស់អាហ្រ្វិកខាងត្បូងពាក់លេខ៤រូបនេះ សម្រាប់ត្រៀមលេង នៅរដូវកាលថ្មី។
តាមរយៈការប្រកាសនេះ បានបង្ហាញថា អតីតខ្សែការពារអាហ្វ្រិកខាងត្បូង KHAN MOHAMMED FAEEZ របស់ក្លិបកងយោធពលខេមរភូមិន្ទ(ទ័ព) រូបនេះ បានក្លាយជាកីឡាករបរទេសដំបូងគេ ក្នុងចំណោមកីឡាករបរទេសទាំង៥នាក់ លេងនៅរដូវកាលឆ្នាំ២០២១ ដែលក្លិបវិសាខា បានសម្រេចបន្តកុងត្រា សម្រាប់ត្រៀមលេងនៅរដូវកាលថ្មី ខណៈ៤នាក់ទៀត វិសាខា នៅមិនទាន់បានប្រកាស នៅឡើយទេ។
តែទោះបីជាយ៉ាងណា នៅក្នុងចំណោមកីឡាករបរទេស៤នាក់ទៀត ដែលក្លិបវិសាខា មិនទាន់បានប្រកាសនោះ គឺអាចនឹងមានបេក្ខភាព២នាក់ ត្រូវចាកចេញ ព្រោះកាលពីប៉ុន្មានថ្ងៃនេះ វិសាខា បាននាំយកកីឡាករជនជាតិប្រេស៊ីល២នាក់ ដើម្បីត្រៀមរដូវកាលថ្មីរួចទៅហើយ ហើយអ្នកទាំង២នេះ រួមមានខ្សែប្រយុទ្ធវ័យ២៨ឆ្នាំ Junior De Barros និងខ្សែបម្រើប្រយុទ្ធ វ័យ២៦ឆ្នាំ Marcos Vinícius។
ជាមួយគ្នានេះ ក្លិបវិសាខា ក៏បាននាំយកគ្រូបង្វឹកមានគុណភាពចំនួន៣នាក់ មករួមគ្នាដឹកនាំក្រុមផងដែរ គឺទី១ អតីតគ្រូបង្វឹកក្រុមជម្រើសជាតិកម្ពុជា លោក Lee Tae Hoon ដែលមានតួនាទីជាអ្នកចាត់ការក្រុម ទី២គឺអតីតគ្រូបង្វឹកក្រុមណាហ្គាវើលដ៍ លោក មាស ចាន់ណា ដែលមកដឹកនាំក្នុងនាមជាគ្រូបង្គោល ហើយទី៣ គឺគ្រូជំនួយក្រុមជម្រើសជាតិកម្ពុជា លោក ភា សុភ័ក្ត្រា ដែលមានតួនាទីក្នុងក្លិបវិសាខា ជាគ្រូវិភាគ៕
