គ្រូបង្វឹកលោក មាស ចាន់ណា បានប្រតិកម្មខ្លាំងទៅនឹងក្លិបណាហ្គាវើលដ៍ ដែលលោកបានធ្លាប់រួមរស់នៅជាមួយអស់រយៈពេល២០ឆ្នាំ ហើយលោកបានចាត់ទុកការជូនដំណឹងយឺតពេលពេក នៃការមិនបន្តកុងត្រាដល់រូបលោក ពីសំណាក់ថ្នាក់ដឹកនាំរបស់ក្លិបនេះ ថាជារឿងខុសទៅនឹងច្បាប់បាល់ទាត់ ដែលប្រៀបដូចទៅនឹងការបោកប្រាស់មួយ សម្រាប់ប្រើរូបលោក ផងដែរ។
បើទោះបីជា លោក មាស ចាន់ណា មិនបានបង្ហាញត្រង់ៗ ពីអ្វីដែលលោកបាននិយាយសំដៅទៅ ប៉ុន្តែតាមរយៈសំណេរយ៉ាងខ្លី ដែលលោកបានបង្ហោះ នៅលើហ្វេសប៊ុក កាលពីព្រលប់ ថ្ងៃអាទិត្យ ម្សិលមិញ បានបញ្ជាក់ច្បាស់រួចទៅហើយថា លោកនិយាយពីថ្នាក់ដឹកនាំរបស់ក្លិបណាហ្គាវើលដ៍ ដែលមិនបានគោរពទៅតាមគោលការណ៍នៃច្បាប់បាល់ទាត់ លើបញ្ហាមិនបន្តកុងត្រាថ្មី ដល់រូបលោក។
លោក មាស ចាន់ណា បានសរសេរបង្ហោះ បែបនេះថា៖ «បើមិនបន្តកុងត្រា សូមអស់លោកគួរតែផ្តល់ដំណឹងដល់គេ យ៉ាងហោចណាស់ ១ ខែមុនផង មិនមែនអស់លោក ផ្តល់ដំណឹងតែកន្លះខែទេ សូមអស់លោកស្គាល់អំពីច្បាប់បាល់ទាត់ផង ព្រោះអស់លោកសុទ្ធតែមកពីប្រទេស ដែលរីកចំរើនផ្នែកបាល់ទាត់ ស្គាល់អំពីច្បាប់បាល់ទាត់។ ខ្ញុំមិនដែលអង្វរ រឺក៏ទ្រអស់លោក ដើម្បីបន្តកុងត្រានោះទេ បើខ្ញុំដឹកនាំអន់ អស់លោក ដកខ្ញុំចេញតាំងពីយូរមកហើយ ( តែកុំមកបោកប្រាស់)»។
ការបង្ហោះសារស័ព្ទនេះ បានក្លាយជារឿងដ៏រសើប ដែលធ្វើឱ្យអ្នកគាំទ្របាល់ទាត់កម្ពុជា មានការចាប់អារម្មណ៍ខ្លាំង ហើយអ្នកខ្លាំង បានកើតជាចម្ងល់ថា ហេតុអ្វី ណាហ្គាវើលដ៍ ដែលជាក្លិបធំមួយ ធ្វើរឿងបែបនេះ? ហើយរឹតតែម្ងល់ទៀតថា ហេតុអ្វី ក្លិបណាហ្គាវើលដ៏ ឈានដល់ចែកផ្លូវជាមួយគ្រូបង្គោល លោក មាស ចាន់ណា? ខណៈបុរសម្នាក់នេះ បានលះបង់ទាំងកម្លាំងកាយ ចិត្ត ចំណេះដឹង និងបទពិសោធ ចំពោះក្លិបនេះ អស់រយៈពេល ២០ ឆ្នាំ មកហើយនោះ។
គួររំឭកថា លោក មាស ចាន់ណា ធ្លាប់លេងឱ្យក្លិបណាហ្គាវើលដ៍ (ពីមុនឈ្មោះ ណាហ្គាខប) អស់រយៈពេល១៣ឆ្នាំ ក្នុងនាមជាកីឡាករដ៏ឆ្នើមម្នាក់ មុនពេលលោកបានវិវឌ្ឍខ្លួនមកធ្វើជាគ្រួជំនួយ និងគ្រូបង្គោល ដឹកនាំក្លិបដដែលនេះ ដោយបើគិតមកដល់ពេលនេះ បានចំនួន៧ឆ្នាំហើយ ហើយក្នុងរយៈពេល២០ឆ្នាំនេះ លោក មាស ចាន់ណា ធ្លាប់ជួយក្លិបនេះ លើកពានលីគកំពូលកម្ពុជា ចំនួន៣ដង កាលពីឆ្នាំ២០០៧ ឆ្នាំ២០០៩ និងឆ្នាំ២០១៨ ចំណែកការប្រកួតពានរង្វាន់សម្តេច ហ៊ុន សែន វិញ លោក មាស ចាន់ណា ធ្លាប់ជួប ណាហ្គាវើលដ៍ ឱ្យឈ្នះពាន១លើក កាលពីឆ្នាំ២០១៣ និងឈ្នះជើងឯករង ចំនួន៦លើក៕