គ្រូបង្វឹកលោក មាស ចាន់ណា ដែលទើបបានចែកផ្លូវជាមួយក្រុមណាហ្គាវើលដ៍ លោក មាស ចាន់ណា បានក្លាយជាអ្នកចាត់ការថ្មីរបស់ក្លិបបាល់ទាត់វិសាខា ដោយលោកនឹងចូលរួមដឹកនាំក្រុមមួយនេះ ទាំងការប្រកួតពានរង្វាន់សម្តេច ហ៊ុន សែន និងលីគកំពូលកម្ពុជា រដូវកាលថ្មី ឆ្នាំ២០២២ ខាងមុខនេះ។
«សូមស្វាគមន៍អ្នកចាត់ការក្រុមថ្មីរបស់យើង មកកាន់គ្រួសារបាល់ទាត់វិសាខា» នេះជាការប្រកាសព័ត៌មាន អមដោយខ្សែវីដេអូខ្លី ដែលក្លិបវិសាខា បានបង្ហោះនៅលើផេចហ្វេសបុកផ្លូវការរបស់ខ្លួន នៅថ្ងៃចន្ទនេះ ដើម្បីស្វាគមន៍ការមកដល់កីឡដ្ឋានព្រីនស៍របស់គ្រូបង្វឹកវ័យក្មេង មានបទពិសោធ លោក មាស ចាន់ណា។
ការចុះហត្ថលេខា នាំយកគ្រូបង្វឹកលោក មាស ចាន់ណា មកធ្វើជាអ្នកចាត់ការក្រុមវិសាខា នេះ បានធ្វើឱ្យអ្នកស្នេហាវិស័យកីឡាបាល់ទាត់នៅកម្ពុជា មានការចាប់អារម្មណ៍ខ្លាំង ដោយគ្រប់គ្នា សុទ្ធតែបានសម្តែងការអបអរដល់អតីតគ្រូបង្គោលក្រុមណាហ្គាវើលដ៍រូបនេះ ហើយសូម្បីអតីតគ្រូបង្គោលក្រុមវិសាខា លោក ហុក សុជីវ័ន ដែលកំពុងដឹកនាំក្រុមកោះកុងអេហ្វស៊ី ក៏បានសម្តែងការអបអរសាទរ ដល់លោក មាស ចាន់ណា សម្រាប់ការទទួលបានការងារថ្មី នៅក្លិបវិសាខា នេះផងដែរ។
វត្តមានរបស់លោក មាស ចាន់ណា ក្នុងនាមជាអ្នកចាត់ការ នៅក្នុងក្លិបវិសាខា នាពេលនេះ បានបង្ហាញឱ្យឃើញថា ថ្នាក់ដឹកនាំក្លិបមួយនេះ ដែលមានលោកស្រី កែ សួនសុភី ជាប្រធានសហព័ន្ធ បាននឹងកំពុងផ្តល់តម្លៃឱ្យគ្រូបង្វឹកក្នុងស្រុក ដើម្បីអាចបញ្ចេញសមត្ថភាព របស់ខ្លួន ខណៈគ្រូជំនួយក្រុមជម្រើសជាតិកម្ពុជា លោក ភា សុភ័ក្រ្តា ដែលជាមិត្តភ័ក្តិរបស់ លោក មាស ចាន់ណា ក៏ទើបត្រូវបានតែងតាំងជាគ្រូបង្វឹកផ្នែកកាយសម្បទា នៅក្នុងក្លិបវិសាខា ផងដែរ៕