បរទេស៖ អនាគតរបស់លោក Nuno Espírito Santo ក្នុងនាមជាអ្នកចាត់ការទូទៅរបស់ក្លិប Tottenham កំពុងតែស្ថិតក្នុងភាពមិនច្បាស់ ក្រោយពីប្រធានក្លិបលោក Daniel Levy និងនាយកគ្រប់គ្រងលោក Fabio Paratici បានរៀបចំកិច្ចពិភាក្សាភ្លាមៗ ក្រោយពីការរងបរាជ័យក្នុងលទ្ធផល ៣-០ ក្រោមស្នាដៃក្រុម Manchester United លើទឹកដីខ្លួនឯងកាលពីថ្ងៃសៅរ៍។
ការរងបរាជ័យដ៏ខកចិត្តនេះ ដែលក្នុងនោះក្រុម Tottenham មិនមានឱកាសស៊ុតបាល់សម្តៅទីសូម្បីតែ១គ្រាប់ ត្រូវបានបង្ហាញឲ្យឃើញនៅពេលដែលអ្នកគាំទ្រជាច្រើនបានស្រែកឲ្យប្តូរអ្នកចាត់ការទូទៅ និងអំពាវនាវឲ្យលោក Levy ចាត់វិធានការ។ វាត្រូវបានគេយល់ឃើញថា បើទោះបីលោក Nuno បានចុះកុងត្រារយៈពេល២ឆ្នាំ កាលពីថ្ងៃទី១ ខែកក្កដាក៏ដោយ ប្រធានក្លិប និងលោក Paratici បានជួបប្រជុំកាលពីថ្ងៃអាទិត្យ ដើម្បីពិភាក្សាទៅលើអនាគតរបស់គ្រូបង្វឹករូបនវ ក្រោយពីការជួបលទ្ធផលដ៏ខកចិត្តជាបន្តបន្ទាប់ ដែលបានធ្វើឲ្យក្រុម Spurs ធ្លាក់ទៅឈរក្នុងចំណាត់ថ្នាក់លេខ៨លើតារាង Premier League។
លោក Sérgio Conceição គ្រូបង្វឹករបស់ក្លិប Porto និងមិត្តរួមជាតិរបស់លោកគឺលោក Paulo Fonseca ដែលត្រូវបានទាក់ទងឲ្យទៅដឹកនាំក្លិប Newcastle ត្រូវបានគេជឿជាក់ថា ស្ថិតក្នុងចំណោមបេក្ខភាពដែលមានអាទិភាពខ្ពស់ក្នុងការទៅដឹកនាំ ប្រសិនបើក្លិប Tottenham សម្រេចចិត្តបណ្តេញលោក Nuno ចេញ ស្របពេលដែលការពិភាក្សាកំពុងតែបន្ត៕
ប្រភពព័ត៌មាន៖ The Guardian
