បរទេស៖ ក្លិប Tottenham បានបណ្តេញលោក Nuno Espirito Santo ចេញពីតំណែងអ្នកចាត់ការទូទៅ ក្រោយពីដឹកបានត្រឹមតែរយៈពេល៤ខែ។ Spurs បានរងបរាជ័យ៥លើក ក្នុងចំណោមការប្រកួតលីក៧លើកចុងក្រោយរបស់ពួកគេ ក្នុងនោះរាប់បញ្ចូលទាំងការចាញ់ក្រុម Manchester United ក្នុងលទ្ធផល ៣-០ កាលពីថ្ងៃសៅរ៍ ផងដែរ។
ពួកគេកំពុងតែស្ថិតក្នុងចំណាត់ថ្នាក់លេខ៨ នៅលើតារាងក្របខ័ណ្ឌ Premier League និងដេញតាមពីក្រោយក្រុមកំពុងតែមានពិន្ទុនាំមុខChelsea ចំនួន១០ពិន្ទុ។ លោក Fabio Paratici នាយកផ្នែកកីឡាបាល់ទាត់ បានឲ្យដឹងថា៖ «ខ្ញុំដឹងពីកម្រិតដែលលោក Nuno និងក្រុមការងាររបស់លោកចង់ទទួលបានជោគជ័យ ហើយខ្ញុំសោកស្តាយណាស់ដែលយើងត្រូវតែធ្វើការសម្រេចចិត្តបែបនេះ»។
គ្របង្វឹកសញ្ជាតិព័រទុយហ្គាល់វ័យ៤៧ឆ្នាំរូបនេះ ត្រូវបានតែងតាំងជាអ្នកចាត់ការទូទៅរបស់ Spurs ក្នុងកិច្ចសន្យារយៈពេល២ឆ្នាំ កាលពីខែមិថុនា ក្រោយពីចំណាយពេលអស់៤ឆ្នាំជាមួយនឹងក្លិប Wolves។ លោក Paratici បានបន្ថែមទៀតថា៖ «លោក Nuno គឺជាសុភាពបុរសយ៉ាងពិតប្រាកដម្នាក់ និងតែងតែស្វាគមន៍ជានិច្ចនៅទីនេះ។ យើងសូមថ្លែអំណរគុណដល់លោក និងក្រុមការងាររបស់លោក ហើយសូមជូនពរឲ្យពួកគេជួបតែសំណាងល្អនៅថ្ងៃអនាគត»៕
ប្រភពព័ត៌មាន៖ BBC
