បរទេស៖ លោក Juergen Klopp អ្នកចាត់ការទូទៅរបស់ក្រុម Liverpool បាននិយាយថា លោក Graham Potter គ្រូបង្វឹករបស់ក្លិប Brighton & Hove Albion មានសមត្ថភាពគ្រប់ផ្នែកទាំងអស់ ក្នុងការទទួលបានជោគជ័យនៅក្លិបភាគខាងត្បូងអង់គ្លេសមួយនេះ ក្រោយពីបានក្រុមរបស់លោកបានបញ្ចប់ក្នុងលទ្ធផលស្មើ ២-២ ក្នុងក្របខ័ណ្ឌ Premier League កាលពីថ្ងៃសៅរ៍។
កីឡាករ Enock Mwepu និង Leandro Trossard របស់ក្រុម Brighton បានរកគ្រាប់បាល់តាមស្មើគ្រាប់បាល់របស់ Jordan Henderson និង Sadio Mane ខណៈដែលពួកគេបានវាយបកតាមពីក្រោយ២គ្រាប់ ដើម្បីដណ្តើមបាន១ពិន្ទុនៅកីឡដ្ឋាន Anfield និងបញ្ចប់ការឈ្នះជាប់ៗរបស់ Liverpool ត្រឹម៤ប្រកួតរាល់យុទ្ធនាការទាំងអស់។ ក្រុមរបស់លោក Potter បានឈ្នះ៤លើកក្នុងចំណោមការប្រកួតបើកឆាក៥លើក នៅមុនពេលស្មើ៤លើកក្នុងចំណោមការប្រកួត៥លើក ដើម្បីឈរលេខក្នុងចំណាត់ថ្នាក់លេខ៧ លើតារាង ដោយមាន១៦ពិន្ទុពីការប្រកួត១០លើក ពោលគឺដេញតាមពីក្រោយ Liverpool ៦ពិន្ទុ។
លោក Klopp បានប្រាប់អ្នកសារព័ត៌មានថា៖ «គាត់ពិតជាមានរាល់ចំណុចដែលអ្នកចង់បាន។ ខ្ញុំក៏មិនស្គាល់ Graham ច្បាស់ដែរ ប៉ុន្តែ អ្វីដែលខ្ញុំអាចនិយាយបានគឺថា គាត់ជាមនុស្សល្អ ហើយក្រុមរបស់លោកបង្ហាញពីសមត្ថភាពរបស់លោកបានយ៉ាងល្អ»៕
ប្រភពព័ត៌មាន៖ Channel News Asia
