បរទេស៖ លោក Thomas Tuchel អ្នកចាត់ការទូទៅរបស់ក្រុម Chelsea បាននិយាយថា លោកមានការសប្បាយរីករាយក្នុងការ «រងនូវការវាយបកដ៏យុត្តិធម៌» ពីគ្រូបង្វឹករបស់ក្រុម Tottenham លោក Antonio Conte ក្រោយពីគ្រូបង្វឹកទាំង២រូបនេះ បានរងពិន័យកាតក្រហមចំពោះការប៉ះទង្គិចគ្នា២លើក អំឡុងពេលការទទួលបានលទ្ធផលស្មើ ២-២ កាលពីថ្ងៃអាទិត្យ។
ការអបអរដ៏ជ្រុលហួសហេតុរបស់លោក Conte ក្នុងពេលក្រុម Spurs បានរកគ្រាប់បាល់តាមស្មើ បានធ្វើឲ្យគ្រូបង្វឹកទាំង២ រងពិន័យកាតលឿងដូចគ្នា សម្រាប់ការប៉ះទង្គិចពាក្យសម្តីគ្នាយ៉ាងតឹងសរសៃក។ បន្ទាប់មក លោក Tuchel បានឆ្លើយតបតាមរយៈការរត់នៅលើខ្សែបន្ទាត់នៃទីលានប្រកួត ដើម្បីអបអរ នៅពេលដែលក្រុម Chelsea បានដណ្តើមការនាំយកជាថ្មី តាមរយៈខ្សែការពារ Reece James ក្នុងរយៈពេល១៣នាទីចុងក្រោយ។ ប៉ុន្តែគ្រាប់បាល់តាមស្មើនៅនាទី ទី៩៦របស់ Harry Kane មានន័យថា លោក Conte បានបញ្ចប់ការប្រកួតទាំងការរីករាយ។ លោក Tuchel មិនស្បាយចិត្តឡើយចំពោះគ្រូបង្វឹកសញ្ជាតិអ៊ីតាលីរូបនេះ ចំពោះការមិនសម្លឹងមុខរបស់លោក អំឡុងពេលចាប់ដៃគ្នារលាក់ ពេលបញ្ចប់ការប្រកួត ដែលនាំឲ្យមានការប៉ះទង្គិចពាក្យសម្តីគ្នាមួយផ្សេងទៀតរវាងគ្រូបង្វឹក និងកីឡាករទាំង២ក្រុម។
ស្របពេលដែលអាកាសធាតុឡើងខ្ពស់ជាង៣០អង្សាសេក្នុងរដ្ឋធានីរបស់អង់គ្លេស លោក Tuchel បាននិយាយថា៖ «អាកាសធាតុពិតជាក្តៅ និងក្តៅគគុករវាងបុគ្គលិកគ្រូបង្វឹក និងបុគ្គលិក ហើយវាក៏មានភាពក្តៅគគុកនៅលើទីលាន និងអ្នកគាំទ្រផងដែរ។ ខ្ញុំមិនមានអារម្មណ៍អន់ចិត្តខ្លាំងឡើយ។ ខ្ញុំមានអារម្មណ៍ថា វាគឺជាការវាយបកគ្នាដ៏យុត្តិធម៌ពីរូបលោក និងពីខ្ញុំផ្ទាល់»៕
ប្រភពព័ត៌មាន៖ Channel News Asia
