ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានស្នើសុំលោកជំទាវ AUDREY AZOULAY អគ្គនាយិកា នៃអង្គការយូណេស្កូ ឱ្យដាក់បញ្ចូលកីឡាគុនល្បុក្កតោ ក្បាច់គុនបុរាណខ្មែរ ទៅក្នុងបញ្ជីសម្បត្តិបេតិកភណ្ឌវប្បធម៌ពិភពលោក។
សំណើនេះ ត្រូវបានធ្វើឡើង នៅពេល ព្រះបាទសម្តេចព្រះបរមនាថ នរោត្តម សីហមុនីស្តេចគង់ បំពេញព្រះរាជកិច្ច នៅទីក្រុងប៉ារីស នៃសាធារណរដ្ឋបារាំង កាលពីថ្ងៃសៅរ៍ ទី១៣ ខែវិច្ឆិកា ឆ្នាំ២០២១ ហើយពេលនេះ ព្រះអង្គ បានស្តេចយាងនិវត្តន៍ពីសាធារណរដ្ឋបារាំង មកដល់មាតុប្រទេសវិញហើយ។
ជាមួយគ្នានោះ ព្រះបាទសម្តេចព្រះបរមនាថ នរោត្តម សីហមុនី ក៏បានស្នើសុំអង្គការយូណេស្កូ ដាក់បញ្ចូល «រមណីយដ្ឋានបុរាណវិទ្យាកោះកេរ្តិ៍» របស់កម្ពុជា ក្នុងបញ្ជីសម្បត្តិបេតិកភណ្ឌវប្បធម៌ពិភពលោក ផងនេះ។ នេះបើតាមព័ត៌មានផ្លូវការ ដែលបានបង្ហោះនៅលើផេចហ្វេសប៊ុករបស់ព្រះបរម្យរាជវាំង (Royal du Cambodge) កាលពីថ្ងៃទី១៣ ខែវិច្ឆិកា នោះដែរ។
តាមសេចក្តីប្រកាសព័ត៌មាន នៅលើផេចហ្វេសប៊ុក Royal du Cambodge នេះ បានបញ្ជាក់ថា៖ «ព្រះមហាក្សត្រ ស្នើសុំអង្គការយូណេស្កូដាក់បញ្ចូល «គុនល្បុក្កតោ ក្បាច់គុនបុរាណខ្មែរ» និង «រមណីយដ្ឋានបុរាណវិទ្យាកោះកេរ្តិ៍» របស់កម្ពុជា ក្នុងបញ្ជីសម្បត្តិបេតិកភណ្ឌវប្បធម៌ពិភពលោក ក្នុងឱកាសស្តេចគង់បំពេញព្រះរាជកិច្ច នៅទីក្រុងប៉ារីស នៃសាធារណរដ្ឋបារាំង»។
ផេចហ្វេសប៊ុកដដែលនេះ បានបញ្ជាក់បន្ថែមថា ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី សព្វព្រះរាជហឫទ័យ ជម្រាបជូនអំពីគោលបំណងរបស់កម្ពុជា ដែលកំពុងរៀបចំឯកសារ ស្នើសុំដាក់បញ្ចូល «គុនល្បុក្កតោ ក្បាច់គុនបុរាណខ្មែរ» ក្នុងប្រភេទបេតិកភណ្ឌវប្បធម៌អរូបី និង «រមណីយដ្ឋានបុរាណវិទ្យាកោះកេរ្តិ៍» របស់កម្ពុជា ក្នុងប្រភេទបេតិកភណ្ឌពិភពលោក ទៅក្នុងបញ្ជីសម្បត្តិបេតិកភណ្ឌវប្បធម៌ពិភពលោក របស់អង្គការយូណេស្កូ ក្នុងព្រះរាជសវនការ ដ៏ឧត្តុង្គឧត្តម ជាមួយលោកជំទាវ AUDREY AZOULAY អគ្គនាយិកា នៃអង្គការយូណេស្កូ កាលពីថ្ងៃទី១៣ ខែវិច្ឆិកានោះ៕