បរទេស៖ វាបានក្លាយជារាត្រីដ៏គួរឲ្យភ្ញាក់ផ្អើលបំផុតក្នុងការប្រកួតជម្រុះព្រឹត្តិការណ៍ World Cup។ ក្រុមបាល់ទាត់ជម្រើសជាតិអ៊ីតាលី ដែលជាម្ចាស់ជើងឯកទ្វីបអឺរ៉ុប បានខកខានក្នុងការឈ្នះកៅអីស្វ័យប្រវត្តិក្នុងការប្រកួតនៅ កាតា ឆ្នាំ២០២២ និងបែរជាត្រូវធ្វើការប្រកួតក្នុងវគ្គ Playoff ទៅវិញ។
ក្រុមដែលមានរហស្សនាមថា Azzurri មួយនេះ បានឈានទៅកាន់ការប្រកួតជម្រុះចុងក្រោយរបស់ខ្លួនជាមួយនឹងក្រុមជម្រើសជាតិអៀរឡង់ខាងជើង ដោយស្ថិតក្នុងចំណាត់ថ្នាក់លេខ១ក្នុងពូល C តាមរយៈការមានគ្រាប់បាល់ស៊ុតបញ្ចូលទីច្រើនជាង ប៉ុន្តែ ការបញ្ចប់ក្នុងលទ្ធផលស្មើ ០-០ នៅទីក្រុង Belfast ស្របពេលដែលក្រុមជម្រើសជាតិស្វ៊ីស បានយកឈ្នះលើក្រុមជម្រើសជាតិប៊ុលហ្គារី ៤-០ បានជួយឲ្យស្វ៊ីស ឈ្នះកៅអីទៅប្រទេសកាតា ជំនួសវិញ។ ការប្រកួតវគ្គ Playoff ម្តងទៀត នឹងរំឭកដល់ការចងចាំដ៏ឈឺចាប់កាលពីឆ្នាំ២០១៧ ដែលនៅពេលនោះ អ៊ីតាលី បានរងបរាជ័យទាំង២លើកក្រោមស្នាដៃក្រុមជម្រើសជាតិស៊ុយអែត និងបានអវត្តមានក្នុង World Cup ឆ្នាំ២០១៨ នៅរុស្ស៊ី ខណៈដែលលទ្ធផលនេះ ត្រូវបានចាត់ទុកថា «ជាសោកនាដកម្ម» ដោយកាសែតអ៊ីតាលី Gazzetta dello Sport។
ប៉ុន្តែ សម្រាប់លោក Roberto Mancini ដែលជាអ្នកចាត់ការទូទៅ ការធ្លាក់ទៅប្រកួតវគ្គ Playoff គ្មានអ្វីដែលគួរឲ្យខ្លាចឡើយ។ គ្រូបង្វឹករូបនេះបានឲ្យដឹងថា៖ «យើងនឹងឈ្នះកៅអីទៅ World Cup នៅខែមីនា ហើយបន្ទាប់មក ប្រហែលជាយើងនឹងឈ្នះពាននេះទៀតក៏ថាបាន។ ខ្ញុំពិតជាពោរពេញដោយការជឿជាក់»៕
ប្រភពព័ត៌មាន៖ BBC
