ខ្សែប្រយុទ្ធ ចាន់ វឌ្ឍនាកា បានបង្កើតរឿងដ៏មិនគួរឱ្យចង់ជឿមួយ គឺការរកបាន២គ្រាប់ជាប់ៗគ្នា ក្នុងរយៈពេលត្រឹម៥នាទី ដើម្បីជួយស្រោចស្រង់ ក្រុមបឹងកេត ឱ្យឡើងទៅកាន់វគ្គពាក់កណ្តាលផ្តាច់ព្រ័ត្រជាមួយក្រុមភ្នំពេញក្រោន វិសាខា និងព្រះខ័នរាជស្វាយរៀង ដែលសុទ្ធតែបានទម្លាក់គូប្រកួតរៀងៗខ្លួន សម្រាប់ការប្រកួតវគ្គជម្រុះ៨ក្រុមចុងក្រោយ កាលពីថ្ងៃអង្គារ ម្សិលមិញ។
ការរកបានម្នាក់១គ្រាប់របស់ខ្សែប្រយុទ្ធជើងចាស់ គួច សុកុម្ភៈ នៅនាទីទី៤ និងការបន្ថែម១គ្រាប់ទៀតរបស់ នុប តុលា នៅនាទីទី ៨៥ វាស្ទើតែជាលទ្ធផលផ្លូវការ សម្រាប់ក្រុមណាហ្គាវើលដ៍ យកឈ្នះក្រុមបឹងកេត ទៅហើយ ព្រោះបឹងកេត ក៏ហាក់អស់ទំនុកចិត្ត ក្នុងការតាមរកគ្រាប់បាល់ផងដែរ។
ប៉ុន្តែរឿងដែលនឹកស្មានមិនដល់ បានកើតមានឡើង នៅពេលខ្សែប្រយុទ្ធ ចាន់ វឌ្ឍនាកា រកបាន១គ្រាប់ តាមពីក្រោយ នៅនាទីទី៨៩ រួចបានបន្ថែម១គ្រាប់ទៀត នៅនាទីទី ៩០+៣ នោះ ហើយជាមួយលទ្ធផលស្មើគ្នា ២-២ បានធ្វើផ្តល់ឱកាសឱ្យក្រុមបឹងកេត បានឈានទៅដល់ការទាត់បាល់ប៉េណាល់ទីកាត់សេចក្តី ជាមួយ ណាហ្គាវើលដ៍ និងបានយកឈ្នះដ៏គួរឱ្យភ្ញាក់ផ្អើល ៨-៧ ជាមួយការទាត់រហូតដល់ម្ខាង៨ដង។
ជាមួយលទ្ធផលដ៏មិនគួរឱ្យជឿនេះ បានជួយឱ្យក្រុមបឹងកេត អាចឡើងទៅកាន់វគ្គពាក់កណ្តាលផ្តាច់ព្រ័ត្រ ដ៏គួរឱ្យរំភើបបំផុត ដោយពួកគេ ត្រូវប្រឈមជាមួយក្រុមម្ចាស់ជើងឯក វិសាខា ដែលបានលត់ក្រុមអាស៊ីអឺរ៉ុប រហូតដល់ ៦-០ កាលពីថ្ងៃអង្គារនោះដែរ ហើយក្នុងនោះ កែវ សុខផេង អាចរកបាន៣គ្រាប់តែម្នាក់ឯង ជាលើកទី២ បន្ទាបន់ពីធ្វើបានសម្រេចលើកទី១ កាល វិសាខា យកឈ្នះក្រុមខេត្តបន្ទាយមានជ័យ ៨-០ ក្នុងវគ្គជម្រុះ១៦ក្រុមចុងក្រោយ។
ផ្ទុយពីនេះក្រុមអគ្គិសនីកម្ពុជា បានបរាជ័យទាំងស្រុង សម្រាប់ការស្វែងរកឱកាស ឡើងទៅវគ្គបន្ត ព្រោះការរកបាន១គ្រាប់របស់ សំអុល ទីណា បានជួយឱ្យក្រុមភ្នំពេញក្រោន អាចយកឈ្នះមួយនេះត្រឹម ១-០ ដ៏តានតឹង ដើម្បីឡើងទៅជួបក្រុមព្រះខ័នរាជស្វាយរៀង ដែលបានយកឈ្នះក្រុមអង្គរថាយហ្គឺរ ៣-០ ក្នុងវគ្គជម្រុះ៨ក្រុមចុងក្រោយ កាលពីថ្ងៃអង្គារម្សិលមិញ នោះដែរ៕
