ក្លិបអ្នកមានទ្រព្យ វិសាខា បាននាំយកកីឡាករសម្បូរបទពិសោធជាជនជាតិប្រេស៊ីលចំនួន២នាក់ ដើម្បីមកជួយក្រុម ត្រៀមការប្រកួតប្រជែង នៅរដូវកាលថ្មី ឆ្នាំ២០២២ ប៉ុន្តែខ្សែបម្រើជប៉ុន ធ្លាប់លេងយូរឆ្នាំ នៅក្លិបឹងកេត បានសម្រេចចាកចេញពីក្លិប មានមូលដ្ឋាននៅកីឡដ្ឋានខេមបូឌាអ៊ែរវ៉េ នេះហើយ។
កីឡាករជនជាត់ប្រេស៊ីល ដែលក្លិបវិសាខា ទើបនាំយកមកជួយក្រុមត្រៀមរដូវកាលនេះ ខ្សែប្រយុទ្ធវ័យ២៨ឆ្នាំ Junior De Barros ដែលគេម្នាក់នេះ ធ្លាប់ជាអតីតសមាជិករបស់ក្លិប Athletico Paranaense លីគកំពូលរបស់ប្រទេសប្រេស៊ីល និងធ្លាប់លេងឱ្យក្លិប Ho Chi Minh City FC លីគកំពូល របស់ប្រទេសវៀតណាម។
ចំណែកម្នាក់ទៀត គឺខ្សែបម្រើប្រយុទ្ធ Marcos Vinícius ហើយកីឡាករវ័យ២៦ឆ្នាំ មានកម្ពស់ ១,៧៧ម៉ែត្រ រូបនេះ ធ្លាប់លេងឱ្យក្លិបជាច្រើន នៅប្រទេសប្រស៊ីល មុនពេលរូបគេ បានចាកចេញពីក្លិប Santa Cruz លីគទី៣ របស់ប្រទេសប្រេស៊ីល មកចូលរួមជាមួយក្រុមវិសាខា នាពេលនេះ។
ខ្សែប្រេយុទ្ធ Marcos Vinicius នឹងពាក់អាវលេខ១៧ សម្រាប់ការមកលេងឱ្យក្រុមវិសាខា ខណៈ Junior De Barros នឹងពាក់អាវលេខ១២ ហើយអ្នកទាំង២នេះ បានបង្ហាញខ្លួន សម្រាប់ការហ្វឹកហាត់ជាផ្លូវការ នៅកីឡដ្ឋានព្រីន របស់វិសាខា ជាផ្លូវការហើយ។
ផ្ទុយពីនេះក្លិបបឹងកេត បានប្រកាសចែកផ្លូវជាមួយកីឡាករជប៉ុន Mizuno Hikaru កាលពីថ្ងៃចន្ទ ម្សិលមិញ។ ខ្សែបម្រើជនជាតិជប៉ុនពាក់លេខ២៨រូបនេះ បានក្លាយជាកីឡាករបរទេស ដែលបានលេងឱ្យក្លិបបឹងកេត យូរឆ្នាំជាងគេ គឺ៥ឆ្នាំមកហើយ ហើយគេជាកីឡាករ ដែលនាំលេងយ៉ាងសំខាន់មួយរូបផងដែរ នៅក្នុងក្រុមបឹងកេត។
នៅមិនទាន់មានព័ត៌មានផ្លូវការថា Mizuno Hikaru នឹងចូលរួមជាមួយក្លិបណាមួយ នៅកម្ពុជា នៅឡើយទេ ប៉ុន្តែនៅក្នុងការប្រកាសចែកផ្លូវគ្នានេះ ក្លិបបឹងកេត បានជូនពរឱ្យ Mizuno Hikaru មានសំណាងល្អ និងទទួលបានជោគជ័យ សម្រាប់ការចូលរួមជាមួយក្រុមថ្មី នាពេលខាងមុខនេះ៕