ក្រុមបឹងកេត បានបរាជ័យរួចទៅហើយ សម្រាប់ការការពារតំណែងជើងឯករបស់ខ្លួន នៅលីគកំពូលកម្ពុជា ឆ្នាំ២០២១នេះ ប៉ុន្តែពួកគេ នឹងក្លាយជាអាជ្ញាកណ្តាល ដែលត្រូវកំណត់ពីជោគវាសនា សម្រាប់ក្រុម ដែលនឹងត្រូវឈ្នះជើងឯកលីគកំពូល សម្រាប់ការប្រកួតបិទរដូវកាល នៅថ្ងៃសុក្រនេះ។
ពិតណាស់ ក្រុមបឹងកេត នៅសល់ត្រឹមឱកាសការពារទីតាំងលេខ៤ ពីការប្រជែងដោយប្រយោលរបស់ក្រុមណាហ្គាវើលដ៍ តែប៉ុណ្ណោះ ហើយពួកគេ បានត្រឹមសម្លឹងមើលពីការប្រជែងគ្នារកពានរវាងក្រុមភ្នំពេញក្រោន ព្រះខ័នរាជស្វាយរៀង និងក្រុមវិសាខា ដែលក្រុមទាំង៣នេះ នៅតាមឱកាសដូចគ្នា។
តែទោះបីជាយ៉ាងណា នៅក្នុងចំណោមក្រុមទាំង៣នេះ ភ្នំពេញក្រោន ជាក្រុមដែលមានភាគរយខ្ពស់ជាងគេ សម្រាប់ការឈ្នះពាន នៅរដូវកាលនេះ ព្រោះតាមរយៈការប្រកួតចំនួន១៨លើកកន្លងមកនេះ ភ្នំពេញក្រោន មាន៤១ពិន្ទុ លើសក្រុមវិសាខា និងស្វាយរៀង ដែលមាន៣៩ពិន្ទុដូចគ្នា។
ជាមួយគ្នានេះ ដោយសារក្រុមទាំង៣ ខាងលើក ត្រូវប្រជែងគ្នា ដោយប្រយោល ដើម្បីរកក្រុមត្រូវឈ្នះពាន នៅថ្ងៃសុក្រនេះ អ៊ីចឹងក្រុមបឹងកេត ដែលជួបក្រុមម្ចាស់ផ្ទះ ភ្នំពេញក្រោន បានគេចាត់ទុកថា ជាអាជ្ញាកណ្តាល និងជាក្រុម ដែលត្រូវកំណត់ពីជោគវាសនា ព្រោះបើសិនជា ពួកគេ បន្តចាញ់ក្រោមដៃ ភ្នំពេញក្រោន នោះ ភ្នំពេញក្រោន នឹងត្រូវលើកពាន ដោយមិនចាំបាច់ខ្វល់ពីលទ្ធផលប្រកួតរបស់ក្រុមវិសាខា និង ស្វាយរៀង នោះទេ។
ផ្ទុយទៅវិញ បើសិនជា បើសិនជា បឹងកេត អាចយកឈ្នះក្រុមភ្នំពេញក្រោន បានវិញ នៅថ្ងៃសុក្រនោះ នោះឱកាសឈ្នះពាន នឹងធ្លាក់ទៅលើ វិសាខា ឬក៏ក្រុមស្វាយរៀង វិញម្តង ខណៈនៅថ្ងៃសុក្រនេះ វិសាខា ត្រូវជួបក្រុមកងយោធពលខេមរភូមិន្ទ ដែលទើបបណ្តេញអ្នកចាត់ការក្រុមលោក Lee Tae-hoon រីឯក្រុមស្វាយរៀង ត្រូវជួបក្រុមម្ចាស់ផ្ទះ អង្គរថាយហ្គឺរ ស្របពេល ណាហ្គាវើលដ៍ ត្រូវស្វាគមន៍ក្រុមគិរីវង់សុខសែនជ័យ ហើយការប្រកួតទាំង៤គូនេះ ត្រូវចាប់ពីម៉ោង ៣:៣០ រសៀល តទៅដូចគ្នា៕
