បរទេស៖ ពិន្ទុនាំមុខរបស់ក្រុម Chelsea នៅលើកំពូលតារាងនៃក្របខ័ណ្ឌ Premier League ត្រូវបានកាត់បន្ថយមកនៅត្រឹម១ពិន្ទុ ក្រោយពីពួកគេបានបញ្ចប់ក្នុងលទ្ធផលស្មើ ១-១ លើទឹកដីខ្លួនឯង ពេលប្រកួតជាមួយនឹងក្រុម Manchester United ស្របពេលដែលក្រុម Manchester City បានផ្តួល West Ham ២-១ កាលពីថ្ងៃអាទិត្យដើម្បីឡើងឈរលេខ២។
ក្រុមតោខៀវ Chelsea របស់លោក Thomas Tuchel មាន៣០ពិន្ទុពីការប្រកួត១៣លើក ខណៈដែល Man City មាន២៩ពិន្ទុ ហើយ Liverpool ដែលបានផ្តួលក្រុម Southampton ក្នុងលទ្ធល ៤-០ កាលពីថ្ងៃសៅរ៍ ដេញតាមពីក្រោយ១ពិន្ទុទៀត។ Man United ដែលស្ថិតក្រោមការដឹកនាំរបស់លោក Michael Carrick ជាគ្រូបង្វឹកបណ្តោះអាសន្ន ក្រោយពីការបណ្តេញលោក Ole Gunnar Solskjaer ចេញ បានទុក Cristiano Ronaldo ស្ថិតជាកីឡាករបម្រុង និងបានប្រើប្រាស់ក្រុមជម្រើសដំបូងដែលផ្តោតលើតំបន់ការពារ ដើម្បីផ្តល់ការខកចិត្តដល់ក្រុមម្ចាស់ផ្ទះ។
លោក Tuchel គ្រូបង្វឹករបស់ក្រុម Chelsea បានឲ្យដឹងថា៖ «ខ្ញុំពិតជារីករាយណាស់ជាមួយនឹងទម្រង់លេងរបស់ក្រុម។យើងបានគ្រប់គ្រងតាំងពីនាទីដំបូង យើងវាយសម្រុ និងមិនដែលបញ្ឈប់ការវាយសម្រុកឡើយ។ យើងត្រូវតែទទួលយកលទ្ធផលនេះ។ យើងលេងបានល្អ ហើយខ្ញុំពេញចិត្ត»៕
ប្រភពព័ត៌មាន៖ Channel News Asia
