បរទេស៖ លោក Michael Carrick បានចាកចេញពីក្លិប Manchester United ក្រោយពីបានកត់ត្រាជ័យជម្នះ១លើក ខណៈដែលខ្សែប្រយុទ្ធ Cristiano Ronaldo បានរកគ្រាប់បាល់ច្រើនជាង៨០០សម្រាប់ក្លិប និងប្រទេសរបស់គេ តាមរយៈការស៊ុតបាល់បញ្ចូលទី២គ្រាប់ ដើម្បីផ្តួលក្រុម Arsenal ក្នុងលទ្ធផល ៣-២ កាលពីថ្ងៃព្រហស្បតិ៍។
លោក Carrick បានកាន់តំណែងក្នុងនាមជាគ្រូបង្វឹកបណ្តោះអាសន្នក្នុងការប្រកួតចុងក្រោយរបស់លោក ខណៈដែលគ្រូបង្វឹកថ្មីលោក Ralf Rangnick បានទស្សនាការប្រកួតពីកៅអីរបស់អ្នកទស្សនា និងបានប្រកាសបន្ទាប់ពីការប្រកួតនេះថា លោកនឹងចាកចេញពីក្លិបនេះ ដោយមិនវិលទៅកាន់តួនាទីគ្រូបង្វឹករបស់លោកឡើយ។ អតីតខ្សែបម្រើរបស់ Man United រូបនេះ គឺជាសមាជិកគ្រូបង្វឹករបស់លោក Ole Gunnar Solskjaer និងបានរងនូវការរិះគន់ពីអតីតមិត្តរួមក្រុមរបស់ខ្លួនគឺលោក Paul Scholes ចំពោះការបន្តនៅក្នុងក្លិបនេះ បន្ទាប់ពីការចាកចេញរបស់លោក Solskjaer។
លោក Carrick បានឲ្យដឹងថា៖ «នេះគឺជាការសម្រេច១០០%របស់ខ្ញុំ។ ខ្ញុំបានគិតថា វាជារឿងដែលត្រឹមត្រូវក្នុងការធ្វើសម្រាប់ក្លិបនេះ និងសម្រាប់លោក Ralf ហើយខ្ញុំពិតជាពេញចិត្តជាមួយនឹងការសម្រេចចិត្តនេះ»។ លោកបានបន្ថែមទៀតថា៖ «យើងបានស្ថិតក្នុងស្ថានភាពមួយដែលមានការទទួលខុសត្រូវក្នុងការដឹកនាំការប្រកួតទាំងនេះ។ ភាពស្មោះត្រង់ចំពោះលោក Ole គឺជាកត្តាតូចមួយប៉ុណ្ណោះ ប៉ុន្តែមានរឿងជាច្រើនដែលបានកើតឡើងក្នុងការសម្រេចចិត្តរបស់ខ្ញុំ»៕
ប្រភពព័ត៌មាន៖ Channel News Asia