បរទេស៖ ក្រុម Arsenal បានបង្ហាញថា ពួកគេនៅតែអាចមានភាពរឹងមាំ បើទោះបីគ្មានខ្សែប្រយុទ្ធ Pierre-Emerick Aubameyang ក៏ដោយ ខណៈដែលក្រុមកាំភ្លើងធំមួយនេះ បានឡើងឈរលេខ៤ជាបណ្តោះអាសន្នក្នុងក្របខ័ណ្ឌ Premier League ក្រោយពីបានយកឈ្នះលើក្រុម West Ham ក្នុងលទ្ធផល ២-០ ស្របពេលដែលវិបត្តិកូវីដ ១៩ បានរីកកាន់តែធំ កាលពីថ្ងៃពុធ។
កីឡាករ Gabriel Martinelli និង Emile Smith Rowe បានស៊ុតបាល់បញ្ចូលទីដូចគ្នា នៅតង់ទី២ ក្នុងការប្រកួតដ៏ស្វិតស្វាញរវាងក្រុមស្ថិតក្នុងទីក្រុងឡុងដ៍តែមួយ នាកីឡដ្ឋាន Emirates ខណៈដែលកីឡាករ Vladimir Coufal របស West Ham បានរងពិន័យកាតក្រហម។ Arsenal នាំមុខ១ពិន្ទុលើក្រុមឈរលេខ៥ West Ham ក្រោយពីឈ្នះ២លើកជាប់ៗគ្នា ដើម្បីកាត់បន្ថយភាពចម្រូងចម្រាស់ជុំវិញការសម្រេចចិត្តរបស់លោក Mikel Arteta ក្នុងការដកហូតតំណែងប្រធានក្រុមពីខ្សែប្រយុទ្ធអន្តរជាតិកាបុង Aubameyang។
ក្រុមរបស់លោក Arteta ស្ថិតក្នុងចំណាត់ថ្នាក់កំពូលទាំង៤ នៅដំណាក់នេះ ជាលើកដំបូង ក្នុងរយៈពេល២ឆ្នាំកន្លះ។ នេះគឺជាការផ្លាស់ប្តូរជោគវាសនាដ៏គួរឲ្យកត់សម្គាល់មួយ ក្រោយពី Arsenal ចាញ់ការប្រកួតក្របខ័ណ្ឌលីក៣លើកជាលើកដំបូងក្នុងរយៈពេល៦៧ឆ្នាំ៕
ប្រភពព័ត៌មាន៖ Channel News Asia