បរទេស៖ លោក Jurgen Klopp បាននិយាយថា Harry Kane គួរតែរងការពិន័យកាតក្រហម សម្រាប់ការប្រព្រឹត្តកំហុសដែលអាចធ្វើឲ្យ Andy Robertson បាក់ជើង ហើយក្រោយមក Liverpool គួរតែទទួលបានបាល់ប៉េណាល់ទី ខណៈដែលលោកផ្ទុះកំហឹងចំពោះការកាត់សេចក្តីរបស់លោកអាជ្ញាកណ្តាល Paul Tierney ក្នុងពេលទទួលលទ្ធផលស្មើ ២-២ នៅលើទឹកដីក្រុម Tottenham។
អ្នកចាត់ការទូទៅរបស់ Liverpool បានធ្វើការតវ៉ាជាមួយនឹងលោក Tierney នៅលើទីលានប្រកួត បន្ទាប់ពីការប្រកួតនេះ និងត្រូវបានគេថតជាប់ពេលកំពុងស្រែកថា៖ «ខ្ញុំមិនមានបញ្ហាជាមួយនឹងអាជ្ញាកណ្តាលណាម្នាក់ឡើយ លើកលែងតែអ្នកប៉ុណ្ណោះ។ អ្នកមិនធ្លាប់បានលេងកីឡាបាល់ទាត់ឡើយ»។ ការផ្ទុះកំហឹងរបស់លក Klopp គឺលើការសម្រេចចិត្តរបស់លោក Tierney ក្នុងការពិន័យត្រឹមតែកាតលឿងដល់ Kane ចំពោះការប្រជែងដណ្តើមយកបាល់ដ៏គ្រោះថ្នាក់ ទៅលើ Roberton និងការបដិសេធរបស់មន្ត្រីអាជ្ញាកណ្តាលផ្នែកវីដេអូលោក Chris Kavanagh ក្នុងការពិចារណាទៅលើការផ្តល់ពិន័យកាតក្រហម។
ក្រោយមក ខ្សែការពារស្លាបឆ្វេងរូបនេះ បានរងពិន័យកាតក្រហម ក្រោយពីរូបគេបានរងពិន័យកាតលឿងជាលើកទី២ ក្រោយពីវីដេអូជំនួយការអាជ្ញាកណ្តាលបានណែនាំឲ្យលោក Tierney ពិនិត្យមើលការដណ្តើមយកបាល់ដ៏គ្រោះថ្នាក់លើ Emerson Royal។ ការបដិសេធរបស់លោកអាជ្ញាកណ្តាលក្នុងការផ្តល់បាល់ប៉េណាល់ទី នៅពេលដែល Emerson បានប្រព្រឹត្តកំហុសលើ Diogo Jota គឺជាចំណុចដ៏ឈឺចាប់មួយទៀត៕
ប្រភពព័ត៌មាន៖ The Guardian
