បរទេស៖ លោក Thomas Tuchel បានរិះគន់ក្របខ័ណ្ឌ Premier League ចំពោះការសម្រេចដាក់ឲ្យក្រុមកំពុងផ្ទុះការឆ្លងកូវីដ ១៩ Chelsea ស្ថិតក្នុងហានិភ័យ តាមរយៈការបង្ខំឲ្យពួកគេលេងនៅលើទឹកដីក្រុម Wolves កាលពីថ្ងៃអាទិត្យ ខណៈដែលក្រុម Manchester City បានលត់ក្រុម Newcastle យ៉ាងចាស់ដៃ ដើម្បីបន្ថែមការនាំមុខរបស់ខ្លួន។
Chelsea បានបញ្ចប់ក្នុងលទ្ធផលស្មើ ០-០ លើទឹកដីក្រុម Molineux ស្របពេលដែលក្រុម Man City បានយកឈ្នះលើក្នុងលទ្ធផល ៤-០។ ប៉ុន្តែ សកម្មភាពលើទីលានប្រកួត ត្រូវបានបាំងបិទដោយពពកខ្មៅនៃវិបត្តិកូវីដ ១៩ នៅចក្រភពអង់គ្លេស ខណៈដែលមានត្រឹមតែការប្រកួត៤គូប៉ុណ្ណោះ ដែលត្រូវបានរៀបចំឡើង ក្នុងចំណោមការប្រកួត១០គូ។ ក្លិបស្ថិតក្នុងក្របខ័ណ្ឌ Premier League នឹងជួបប្រជុំគ្នានៅថ្ងៃចន្ទ ដើម្បីពិភាក្សាពីវិធានការដែលត្រូវអនុវត្តជុំវិញការផ្ទុះការឆ្លងជាថ្មីនេះ ខណៈដែលមានសំណួរជាច្រើនជុំវិញបូរណភាពនៃយុទ្ធនាការនេះ ស្របពេលដែលកម្មវិធីប្រកួតដ៏មមាញឹកក្នុងកម្មវិធីបុណ្យខិតកាន់តែកៀក។
Chelsea ដែលត្រូវបានគេបដិសេធលើសំណើសុំពន្យារពេលការប្រកួតនោះ មានត្រឹមតែកីឡាករ១៤នាក់ប៉ុណ្ណោះ នៅថ្ងៃប្រកួតរបស់ខ្លួនកាលពីថ្ងៃអាទិត្យ ខណៈដែល N’Golo Kante, Mateo Kovacic និង Trevoh Chalobah សុទ្ធសឹងបានចូលលេង បើទោះបីមិនទាន់មាភាពរឹងមាំគ្រប់គ្រាន់ក៏ដោយ។ លោក Tuchel ដែលក្រុមរបស់លោកមានឱកាសស៊ុតបាល់ចំគោលដៅតែ១លើកនោះ បាននិយាយថា៖ «យើងត្រូវបានដាក់ឲ្យស្ថិតក្នុងហានិភ័យ ទាក់ទងនឹងសុវត្ថិភាព និងសុខភាពកីឡាករ មិនមែនដោយសារតែកូវីដ ឡើយ ប៉ុន្តែ ក៏ដោយសារតែភាពរឹងមាំផងដែរ»៕
