បរទេស៖ ខ្សែការពារ Virgil van Dijk ខ្សែបម្រើ Thiago Alcantara, Fabinho និង Curtis Jones កំពុងតែវិលទៅកាន់ទីលានហ្វឹកហាត់វិញ ក្រោយពីបានដាក់ឲ្យនៅដាច់ដោយឡែកដោយសារតែឆ្លងកូវីដ ១៩។ នេះបើយោងទៅតាមការបញ្ជាក់របស់លោកគ្រូបង្វឹក Juergen Klopp កាលពីថ្ងៃចន្ទ។
នៅមុនពេលការប្រកួតក្របខ័ណ្ឌ Premier League នៅលើទឹកដីក្រុម Leicester City នៅរាត្រីនេះ លោក Klopp បានប្រាប់អ្នកយកព័ត៌មានថា៖ «ពិតណាស់ កីឡាករទាំង៤ ដែលបានធ្វើចត្តាឡីស័ក ឬក៏ឆ្លងកូវីដ ១៩ វិលត្រឡប់មកវិញហើយ។ កីឡាករទាំងនោះគឺ Fab, Virgil, Curtis និង Thiago»។ គ្រូបង្វឹកសញ្ជាតិអាល្លឺម៉ង់រូបនេះបានបន្ថែមទៀតថា៖ «Thiago គឺជាកីឡាករចុងក្រោយគេ រូបគេបានវិលមកវិញ និងបានហ្វឹកហាត់កាលពីម្សិលមិញជាលើកដំបូងជាមួយនឹងក្រុម។ យើងមានកីឡាករវ័យក្មេងម្នាក់ទៀតដែលកំពុងតែធ្វើចត្តាឡីស័ក និងបុគ្គលិក២នាក់ទៀត។
វាពិតជាលំបាកបន្តិច ដោយជារៀងរាល់ព្រឹក មានអ្នកចេញ និងអ្នកចូល ដូចជាការចាប់ឆ្នោតអ៊ីចឹង។ យើងសង្ឃឹមថា វាគ្មានបញ្ហាអ្វីឡើយ ហើយនោះគឺជាស្ថានភាព ប៉ុន្តែ ក្រៅពីនេះ យើងគ្មានបញ្ហាឡើយ»។ កម្មវិធីប្រកួតនៅថ្ងៃ Boxing Day របស់ Liverpool ជាមួយនឹង Leeds United នាកីឡដ្ឋាន Anfield ត្រូវបានពន្យារពេល ដោយសារតែករណីឆ្លងកូវីដ ១៩ និងរបួសកីឡាកររបស់ក្រុមភ្ញៀវ៕
ប្រភពព័ត៌មាន៖ Channel News Asia
