ក្រុមភ្នំពេញក្រោន បានធ្វើឱ្យគ្រប់គ្នា មើលឃើញកាន់តែច្បាស់ថា ពួកគេស័ក្តិសមនឹង ឈានទៅរកការឈ្នះពាន សម្រាប់ការប្រកួតបាល់ទាត់ជម្រើសជើងឯកបាល់ទាត់នារី ឆ្នាំ២០២១ បន្ទាប់ពីពួកគេ បានបន្តយកឈ្នះលើគូប្រជែងដ៏ខ្លាំង គឺក្រុមម្ចាស់ជើងឯក ណាហ្គាវើលដ៍កំពង់ស្ពឺ កាលពីថ្ងៃអាទិត្យ ចំណែកក្រុមជើងឯករង ព្រះខ័នរាជស្វាយរៀង បានរកឃើញលទ្ធផលដ៏ល្អ ដើម្បីស្រោចស្រង់ភាពដុនដាប ចំពោះការចាញ់២លើកជាប់ៗគ្នា កន្លងមកនេះ។
បើទោះបីជា ការប្រកួត៣លើកកន្លងមកនេះ ក្រុមនារីណាហ្គាវើលដ៍ បានឈ្នះទាំង៣ប្រកួត ដើម្បីរក្សាបានភាពខ្លាំងរបស់ខ្លួន ប៉ុន្តែពួកគេ មិនអាចធ្វើអ្វីទៅលើក្រុមភ្ញៀវ ភ្នំពេញក្រោន បាននោះទេ សម្រាប់ការប្រកួតលើកទី៤ កាលពីថ្ងៃអាទិត្យ ម្សិលមិញ គឺពួកគេបានចាញ់ ២-០ ដ៏គួរឱ្យសោកស្តាយ។
តាមរយៈការប្រកួតប្រជែងយ៉ាងស្វិតស្វាញនោះ ក្រុមណាហ្គាវើលដ៍ និងភ្នំពេញក្រោន បានវាយបកគ្នាទៅវិញទៅមក ហើយក្រុមទាំង២នេះ សុទ្ធតែបានបង្កើតឱកាសរៀងៗខ្លួន ប៉ុន្តែណាហ្គាវើលដ៍ មិនអាចរកបានគ្រាប់បាល់នោះទេ។ ផ្ទុយទៅវិញការបញ្ចូនបាល់យ៉ាងស្អាតពីសំណាក់មិត្តរួមក្រុមបានជួយខ្សែប្រយុទ្ធលេខ១៩ ពឿន គន្ធា អាចស៊ុតបំប៉ោងសំណាញ់ទីឱ្យ ភ្នំពេញក្រោន នៅនាទីទី៤០ ហើយកីឡាការិនី ស៊ីវហុង ដែលទើបប្តូរចូល បានបន្ថែម១គ្រាប់ទៀត នៅនាទីទី៨២។
ការទទួលបានជ័យជម្នះដ៏មានន័យនេះ បានជួយឱ្យក្រុមនារី ភ្នំពេញក្រោន បានឈរនៅលេខ១ ដោយមាន១២ពិន្ទុពេញ ជាមួយការឈ្នះទាំង៤លើក ហើយការមានលទ្ធភាពអាចយកឈ្នះលើក្រុមនារី ណាហ្គាវើលដ៍ ដល់ ២-០ លើកនេះ អាចបង្ហាញឱ្យឃើញថា ភ្នំពេញក្រោន អាចនឹងមានភាគរយខ្ពស់ ក្នុងការឈានទៅរកការឈ្នះពាន សម្រាប់រដូវកាល ឆ្នាំ២០២១នេះ។
ចំណែកក្រុមសៀមរាប ក៏បានបន្តយកឈ្នះលើក្រុមនារី បឹងកេត ២-០ ដើម្បីបន្តកំណត់ត្រាឈ្នះទាំង៤ប្រកួតផងដែរ រីឯក្រុមនារី ព្រះខ័នរាជស្វាយរៀង ដែលទើបបានចាញ់ក្រុមណាហ្គាវើលដ៏ និងក្រុមសៀមរាប នោះ បានលត់ក្រុមមន្ទីរអយកខេត្តកណ្តាល ដល់ ១០-០ កាលពីថ្ងៃអាទិត្យនោះដែរ គឺស្របពេលក្រុមមន្ទីរអយកខេត្តបាត់ដំបង បានយកឈ្នះក្រុមមន្ទីរអយកខេត្តកំពុងឆ្នាំង ៦-៣៕
