ក្រុមនារីភ្នំពេញក្រោន មិនបានបន្ថយល្បឿន ក្នុងការឈានទៅរកការឈ្នះតំណែងជើងឯក នៃការប្រកួតជម្រើសជើងឯកបាល់ទាត់នារី ឆ្នាំ២០២១ នោះទេ ខណៈពួកគេ បានបន្តយកឈ្នះលើក្រុមជើងឯកស្ទួន ព្រះខ័នរាជស្វាយរៀង កាលពីថ្ងៃអាទិត្យ គឺស្របពេលដែលក្រុមនារីណាហ្គាវើលដ៍កំពង់ស្ពឺ បានលត់ក្រុមម្ចាស់ផ្ទះមន្ទីរអយកខេត្តកំពង់ឆ្នាំង រហូតដល់ ១៨-០ ដើម្បីបន្តឈរនៅលេខ២។
សម្រាប់ការប្រកួតបើកឆាក នៅជើងទី២នេះ ក្រុមព្រះខ័នរាជស្វាយរៀង បានប្រឹងប្រែងយ៉ាងខ្លាំង ព្រោះពួកគេ ចង់យកឈ្នះក្រុមភ្នំពេញក្រោន នៅលើទឹកដីរបស់ខ្លួនឯង វិញម្តង ដើម្បីលុបលាងភាពឈឺចាប់ សម្រាប់ការចាញ់ក្រុមនារីភ្នំពេញក្រោន ២-១ នៅក្រៅទឹកដី សម្រាប់ការជួបគ្នា កាលពីជើងទី១។
តែទោះបីជាយ៉ាងណា ក្រុមនារីព្រះខ័នរាជស្វាយរៀង បានមិនអាចរកបានសូម្បី១គ្រាប់ ផ្ទុយទៅវិញ ការរកបានម្នាក់១គ្រាប់របស់ខ្សែប្រយុទ្ធ ពឿន គន្ធា នៅនាទីទី៦២ និង អ៊ិន ស្រីនិច នៅនាទីទី៧៣ បានធានាឱ្យក្រុមនារីភ្នំពេញក្រោន បន្តដណ្តើមបាន៣ពិន្ទុ និងបន្តឈរនៅកំពូលតារាង ក្នុងនាមជាក្រុមតែមួយគត់ ដែលមិនទាន់ស្គាល់ការចាញ់សោះ ព្រោះ៨ប្រកួតនេះ ភ្នំពេញក្រោន បានឈ្នះទាំងអស់ និងមាន២៤ពិន្ទុ គឺបង្ហាញថា ភ្នំពេញក្រោន បានបោះជំហានទៅមុខយ៉ាងរលូន ក្នុងការឈ្នះទៅរកការឈ្នះជើងឯក ក្នុងការប្រកួតនេះ បន្ទាប់ពីខកចិត្ត និងបានត្រឹមលេខ៣ កាលពីឆ្នាំ២០២០។
យ៉ាងណាមិញ ក្រុមម្ចាស់ជើងឯក ណាហ្គាវើលដ៍កំពង់ស្ពឺ បានរកឃើញលទ្ធផលដ៏ល្អបំផុត ដែលពួកគេ មិនធ្លាប់ធ្វើបាននោះទេ គឺការយកឈ្នះក្រុមម្ចាស់ផ្ទះមន្ទីរអយកខេត្តកំពង់ឆ្នាំង ១៨-០។ បើទោះបីជាលទ្ធផលនេះ វានៅទាបជាងកំណត់ត្រារបស់ ភ្នំពេញក្រោន ដែលបានយកឈ្នះក្រុមខេត្តកំពង់ឆ្នាំង ដល់ ១៩-០ ប៉ុន្តែការដណ្តើមបានជ័យជម្នះដ៏ធំនេះ បានជួយឱ្យ ណាហ្គាវើលដ៍ នៅតែមានរំពឹង ក្នុងការតាមប្រជែងយកពានជាមួយ ភ្នំពេញក្រោន ទោះពេលនេះ ពួកគេ មានត្រឹម១៨ពិន្ទុ ក៏ដោយ។
ចំណែកក្រុមសៀមរាប បានយកឈ្នះក្រុមមន្ទីរអយកខេត្តបាត់ដំបង ៥-១ ដើម្បីបន្តឈរនៅលេខ៣ ដោយមាន១៨ពិន្ទុស្មើជាមួយក្រុមណាហ្គាវើលដ៍ ដដែល ប៉ុន្តែក្រុមមានទម្រង់ឡើងចុះ មិនទៀតទាន់ បឹងកេត បានទៅស្មើក្រុមមន្ទីរអយកខេត្តកណ្តាល ១-១ ដែលពួកគេ ធ្លាប់លត់ ១០-០ កាលពីជើងទី១៕