ខ្សែប្រយុទ្ធជាប្រធាន បាន ជាវៃ របស់ក្រុមភ្នំពេញក្រោន អាចរកបានរហូតដល់៨គ្រាប់តែម្នាក់ឯង ក្នុងការប្រកួតបាល់ទាត់ជម្រើសជើងឯកបាល់ទាត់នារី ឆ្នាំ២០២១ កាលពីថ្ងៃអាទិត្យ ប៉ុន្តែកីឡាការិនីចំនួន២នាក់របស់ក្រុមណាហ្គាវើលដ៍កំពង់ស្ពឺ និងក្រុមមន្ទីរអយកខេត្តបាត់ដំបង សុទ្ធតែត្រូវបានបញ្ជូនទៅកាន់មន្ទីរពេទ្យភ្លាមៗ បន្ទាប់ពីអ្នកទាំង២ បានជួបនៅហេតុការណ៍ប៉ះទង្គិចគ្នា បណ្តាលឱ្យមានរបួស និងបាត់បង់ស្មារតីនោះ។
សម្រាប់ការប្រកួត នៅលើទីលានផ្សេងៗគ្នា កាលពីម្សិលមិញនេះ ប្រធានក្រុមពាក់លេខ១១ បាន ជាវៃ បានក្លាយជាអ្នករកបានគ្រាប់បាល់ដ៏គួរឱ្យភ្ញាក់ផ្អើល ខណៈរូបនាង អាចរកបានរហូតដល់៨គ្រាប់តែម្នាក់ឯង ពេលក្រុមនារីភ្នំពេញក្រោន បានលត់ក្រុមមន្ទីរអយកខេត្តកណ្តាល ១៧-០។
ជាមួយការរកបាន៨គ្រាប់ បន្ថែមទៅលើគ្រាប់បាល់រកបានកន្លែងមកចំនួន៥គ្រាប់ទៀតនោះ វាធ្វើឱ្យ បាន ជាវៃ មានភាគរយកាន់តែខ្ពស់ ក្នុងការប្រជែងយកស្បែកជើងមាស ក្នុងរដូវកាលនេះ ហើយជាមួយគ្នានេះ ក្រុមភ្នំពេញក្រោន ក៏មានភាគរយច្រើន ក្នុងការឈានទៅរកការឈ្នះពាន ជាលើកដំបូងដូចគ្នា ព្រោះនេះជាការឈ្នះជាប់ៗគ្នាលើកទី៦របស់ពួកគេ ដើម្បីបន្តឈរនៅលើកំពូលតារាង ដោយមាន១៨ពិន្ទុពេញ។
ដោយឡែកក្រុមម្ចាស់ជើងស្ទួន កាលពីរដូវកាលឆ្នាំ២០២០ ណាហ្គាវើលដ៍កំពង់ស្ពឺ និងក្រុមព្រះខ័នរាជស្វាយរៀង សុទ្ធតែទទួលបាន៣ពិន្ទុន្ថែម ដោយក្នុងនោះក្រុមនារីណាហ្គាវើលដ៍ បានយកឈ្នះក្រុមនារីសៀមរាប ៦-០ ដើម្បីបន្តឈរនៅលេខ២ មាន១៥ពិន្ទុ ចំណែក ស្វាយរៀង បានលត់ក្រុមមន្ទីរអយកខេត្តបាត់ដំបង ១១-០ ដើម្បីបន្តឈរនៅលេខ៤ មាន៩ពិន្ទុ។ ចំណែកក្រុមនារីបឹងកេត បានយកឈ្នះក្រុមមន្ទីរអយកខេត្តកំពង់ឆ្នាំង ២-១ ទាំងលំបាក។
យ៉ាងណាក៏ដោយជាមួយជ័យជម្នះនេះ កីឡាការិនីពាក់លេខ៧ ថុង ពិសី របស់ណាហ្គាវើលដ៍ បានប៉ះទង្គិចគ្នាហើយមានរបួសនៅថ្ងាសហូរឈាម ត្រូវបញ្ជូនទៅមន្ទីរពេទ្យបង្អែកខេត្តភ្លាមៗ។ ជាមួយរបួសនេះ ថុង ពិសី ត្រូវបានដេរអស់៤ថ្នេរ ប៉ុន្តែខាងមន្ទីរពេទ្យ បានបញ្ជាក់ថា នាងមិនមានអាការធ្ងន់ធ្ងរទេ ហើយគ្រូពេទ្យ បានសម្រេចឱ្យ ថុង ពិសី ត្រឡប់ទៅផ្ទះវិញ ក្រោយពេលអស់សារ៉ូម។
សម្រាប់ការប្រកួត កាលពីថ្ងៃអាទិត្យនោះដែរ អ្នកចាំទីពាក់លេខ១ របស់ក្រុមមន្ទីរអយកខេត្តបាត់ដំបង បានបាត់ស្មារតីមួយភ្លែត បន្ទាប់ពីបានប៉ះគ្នាជាមួយកីឡាការិនីរបស់ក្រុមព្រះខ័នរាជស្វាយរៀង នៅចុងតង់ទី២ តែពេលបានបញ្ជូនទៅមន្ទីពេទ្យ កីឡាការិនីរូបនេះ បានធូរស្បើយធម្មតា និងបានចេញពីពេទ្យត្រឡប់ទៅកន្លែងស្នាក់នៅវិញហើយ៕