បរទេស៖ ខ្សែប្រយុទ្ធ Pierre-Emerick Aubameyang របស់ក្លិប Arsenal ត្រូវបានអនុញ្ញាតឲ្យចាកចេញពីក្រុមបាល់ទាត់ជម្រើសជាតិហ្គាបុង ដែលកំពុងបំពេញកាតព្វកិច្ចក្នុងព្រឹត្តិការណ៍ Africa Cup of Nations ក្នុងប្រទេសកាមេរូន និងវិលទៅកាន់ក្លិបរបស់គេវិញ ដើម្បីបន្តសម្រាកព្យាបាលពីវីរុសកូវីដ ១៩។ នេះបើយោងទៅតាមការបញ្ជាក់របស់គ្រូបង្វឹកនៃក្រុមជម្រើសជាតិរបស់គេកាលពីថ្ងៃចន្ទ។
ខ្សែបម្រើ Mario Lemina របស់ក្លិបបារាំង Nice ក៏ត្រូវបានបញ្ជូនឲ្យវិលត្រឡប់ទៅក្លិបរបស់គេវិញផងដែរ ខណៈដែលកីឡាករទាំង២ មិនបានចូលលេងសោះក្នុងចំណោមការប្រកួតទាំង២លើករបស់ហ្គាបុង ក្នុងព្រឹត្តិការណ៍ Cup of Nations មកទល់ពេលនេះ នៅពេលប៉ះក្រុមជម្រើសជាតិកូម៉ូរូស និងហ្គាណា។
លោក Patrice Neveu គ្រូបង្វឹកនៃក្រុមជម្រើសជាតិហ្គាបុង បានប្រាប់អ្នកយកព័ត៌មានក្នុងទីក្រុង Yaounde ថា៖ «ដោយសារតែបញ្ហាសុខភាពដែល Pierre-Emerick និង Mario មាន រួមមានការយល់ព្រមពីគ្រូពេទ្យ ប្រធានសហព័ន្ធ និងកីឡាករ យើងបានធ្វើការសម្រេចចិត្តដ៏ឆ្លាតវៃនេះ ដើម្បីបញ្ជូនពួកគេឲ្យវិលត្រឡប់ទៅក្លិបរបស់ពួកគេវិញ ដើម្បីឲ្យពួកគេអាចទទួលបានការមើលថែកាន់តែល្អប្រសើរ»៕
ប្រភពព័ត៌មាន៖ Channel News Asia