បរទេស៖ ក្រុម Barcelona និងខ្សែប្រយុទ្ធឡើងទម្រង់លេង Pierre-Emerick Aubameyang និង Sevilla ដែលជាក្រុមជើងខ្លាំងក្នុង Europa League នឹងក្លាយជាបេក្ខភាពឈានមុខគេរបស់អេស្ប៉ាញ ក្នុងក្របខ័ណ្ឌ Europa League វគ្គ១៦ក្រុមចុងក្រោយ នៅរាត្រីនេះ។
Sevilla នឹងធ្វើជាម្ចាស់ផ្ទះទទួលក្រុមអង់គ្លេស West Ham ក្នុងការប្រកួតជើងទី១ ស្របពេលដែលក្រុម Barcelona នឹងត្រូវប៉ះជាមួយនឹងក្រុមតួកគី Galatasaray នាកីឡដ្ឋាន Camp Nou ខណៈនេះគឺជាការប្រកួតដ៏គួរឲ្យចាប់អារម្មណ៍បំផុតក្នុងជុំនេះ។ ក្រុមម្ចាស់ជើងឯកប្រចាំទ្វីបអឺរ៉ុប៥សម័យកាល Barcelona នៅតែត្រូវសម្របខ្លួនជាមួយនឹងបរិស្ថាននានា ក្នុងយុទ្ធនាការលំដាប់ទី២របស់អឺរ៉ុបមួយនេះ ក្រោយពីបានធ្លាក់ចេញពីក្របខ័ណ្ឌ Champions League ក្នុងវគ្គចែកពូល ជាលើកដំបូងក្នុងរយៈពេល១៨ឆ្នាំ។
ពួកគេនឹងត្រូវប៉ះជាមួយនឹងក្រុម Galatasaray ក្រោយពីបានបង្ហាញពីទម្រង់លេងយ៉ាងល្អជាបន្តបន្ទាប់នៅរដូវកាលនេះ ក្រោយពីបានកត់ត្រាជ័យជម្នះ៤លើកជាប់ៗគ្នា ក្នុងនោះរាប់បញ្ចូលទាំងការយកឈ្នះលើក្រុម Napoli ក្នុងលទ្ធផល ៤-២ កាលពីជុំមុនផងដែរ។ ពួកគេកំពុងតែស្ថិតក្នុងចំណាត់ថ្នាក់លេខ៣ លើតារាង La Liga និងមិនធ្លាប់ចាញ់សោះ បើគិតចាប់តាំងពីខែធ្នូ ក្រោយពីបានទិញចូលកីឡាករថ្មីមួយចំនួនកាលពីខែមករា ដូចជា Aubameyang រួមទាំង Ferran Torees និង Adama Traore៕
ប្រភពព័ត៌មាន៖ Channel News Asia