អតីតកីឡាករជើងខ្លាំង ផាន់ គ្រាន់ បាននឹងកំពុងហ្វឹកហាត់ខ្លាំង ដើម្បីសម្រកទម្ងន់មកវ៉ៃម៉ារ៉ាតុងដណ្តើមប្រាក់លាន ប្រភេទទម្ងន់៦៣,៥គីឡូក្រាម នៅលើសង្វៀនថោន នាថ្ងៃអាទិត្យនេះ ហើយរូបគេ បានអះអាងថា ប្រាក់រង្វាន់លេខ១ ចំនួន ៣,៤លានរៀល នឹងក្លាយជារបស់គេ ជាមិនខាន។
បើទោះបីជាគ្រប់គ្នា គិតថា មានការលំបាក ចំពោះការសម្រកទម្ងន់ពីជាង៧០គីឡូក្រាម មក៦៣,៥គីឡូក្រាម ជារឿងពិបាក និងអាចធ្វើឱ្យប៉ះពាល់ដល់សុខភាព ប៉ុន្តែចំពោះ ផាន់ គ្រាន់ បានបញ្ជាក់ថា វាមិនមានបញ្ហាអ្វីចំពោះនោះទេ ព្រោះរូបគេបានសមរួចទៅហើយ ចំពោះការសម្រកទម្ងន់បែបនេះ ហើយការវិលត្រឡប់មកកាន់សង្វៀនលើកនេះ ផាន់ គ្រាន់ ថា លែងទៅណាទៀតហើយ។
ផាន់ គ្រាន់ បាននិយាយថា៖«រយៈពេល១ខែនេះ អ៊ុំឱ្យខ្ញុំហ្វឹកហាត់រហូត អត់មានឡើងប្រកួតនៅឯណាទេ គឺខំសម្រកទមម្ងន់ ចាំវ៉ៃដណ្តើមប្រាក់លាន ទម្ងន់៦៣,៥គីឡូក្រាមនេះ ហើយវាគ្មានបញ្ហាអ្វីចំពោះចំពោះការសម្រកទម្ងន់នេះ គឺខ្ញុំបានសមរួចទៅហើយ។ ខ្ញុំអាចធ្វើបាន ហើយវិលមកវិញលើកនេះ ខ្ញុំដាក់ចិត្តវ៉ៃរហូត លែងទៅណាទៀតហើយ»។
ការវិលមកវិញលើកនេះ ផាន់ គ្រាន់ ត្រូវបានដាក់ឱ្យប្រកួតដណ្តើមប្រាក់លានជាមួយបេក្ខភាព៣នាក់ទៀត រួមមាន សៀវ ង៉យ, សោម វិឆ័យ និង សំ អាន។ ផាន់ គ្រាន់ បានដឹងថរួចទៅហើយថា បេក្ខភាពទាំង៣នាក់នេះ ជាពិសេស សោម វិឆ័យ និង សំ អាន អាចនឹងមានកម្លាំងខ្លាំង ប៉ុន្តែ ផាន់ គ្រាន់ មិនបានបង្ហាញការបារម្ភនោះទេ ផ្ទុយទៅវិញរូបគេអះអាងថា នឹងយកប្រាក់លាន លើកនេះឱ្យបាន។
«ពួកគេ សុទ្ធតែជាកីឡាវ័យក្មេង ដែលល្អស៊ុហ្វ និងកម្លាំង អ៊ីចឹងទោះជួបមួយណាក៏តានតឹងដែរ ប៉ុន្តែខ្ញុំអត់មានការបារម្ភទេ ព្រោះខ្ញុំធ្លាប់ឡើងប្រកួតយូរហើយ អត់ចង់បារម្ភអ្វីទៀតទេ ហើយការចូលលេង ប្រាក់លានលើកនេះ ខ្ញុំប្តេជ្ញាចិត្តថា នឹងលើកស្លាកប្រាក់រង្វាន់ ៣,៤ លានរៀលឱ្យបាន»។ ផាន់ គ្រាន់ បានបញ្ជាក់។
នៅក្នុងចំណោមបេក្ខភាពទាំង៤នេះ អ្នកទស្សនាភាគច្រើន បានផ្តល់ការជឿជាក់ទីលើ សោម វិឆ័យ និង ផាន់ គ្រាន់ ថានឹងអាចមានម្នាក់ ឈ្នះបានប្រាក់លាន លើកនេះ ចំណែកកីឡាករជើងចាស់ ដែលលេច អណ្តែតៗជាមួយការមិនសូវបានឡើងប្រកួត និងជើងថ្មី សំ អាន មិនសូវទទួលបានការគាំទ្រប៉ុន្មានទេ ខណៈអ្នកទស្សនាខ្លះ បានលាត់មានថា ដាក់អ្នកទាំង២នេះ មកចូលរួមធ្វើអី?។
តែទោះបីជាយ៉ាងណា សៀវ ង៉ុយ ដែលទើបបានផ្លាស់ប្តូរមកនៅក្លិបអភិរក្សគុនខ្មែររុងរឿងជាមួយលោកគ្រូ សួង បញ្ញា នោះ បានប្តេជ្ញាថា នឹងដណ្តើមប្រាក់លាននេះឱ្យបាន។ម្ចាស់ខ្សែក្រវាត់ ៤ ស្ថាប័ន សៀវ ង៉ុយ បាននិយាយថា៖ «ខ្ញុំបានផ្លាស់មកនៅក្លិបអភិរក្សរុងរឿង ជិត ១ ខែហើយ ហើយនេះជាការប្រកួតលើកទី២ របស់ខ្ញុំ»។
សៀវ ង៉ុយ បានបន្ថែមថា៖«នៅក្នុងចំណោមបេក្ខភាពដណ្តើមប្រាក់លានលើកនេះ ខ្ញុំធ្លាប់បានជួប សោម វិឆ័យ តែ ២ នាក់ទៀត មិនធ្លាប់ជួបទេ។ និយាយរួមអ្នកទាំង៣នេះ មានចំណុចល្អម្យ៉ាងៗម្នាក់ អ៊ីចឹងទោះជួបមួយណា ក៏តានតឹងដែរ ប៉ុន្តែខ្ញុំត្រៀមខ្លួនបានល្អ ហើយប្តេជ្ញាថា នឹងយកប្រាក់លាននេះឱ្យបាន»៕