ខ្សែប្រយុទ្ធចំណូលថ្មីមកពីស៊ូដង់ខាងត្បូងកម្ពស់ ២,០១ម៉ែត្រ Athiu Kenjok Wal ជាអ្នករកបានគ្រាប់បាល់ជ័យជម្នះ ទៅឱ្យក្រុមវិសាខា ដើម្បីយកឈ្នះក្រុមបឹងកេត ៣-២ នៅក្នុងការប្រកួតបាល់ទាត់ពានរង្វាន់ Prince Beer Pre-Season Cup 2022 កាលពីថ្ងៃពុធ ម្សិលមិញ គឺបន្ទាប់ពីខ្សែប្រយុទ្ធឆ្នើម ចាន់ វឌ្ឍនាកា មានរបួសជង្គង់ និងត្រូវបានសែងចេញពីទីលាន តាំងពីតង់ទី១។
សម្រាប់ការប្រកួតកាត់សេចក្តីចុងក្រោយប្រចាំពូលB កាលពីម្សិលមិញនេះ បឹងកេត ត្រូវការឈ្នះខ្លាំងបំផុត ហើយត្រូវឈ្នះជាមួយគ្រាប់បាល់លើសពី២គ្រាប់ទៅទៀត ទើបអាចបានឡើងទៅវគ្គពាក់កណ្តាលផ្តាច់ព្រ័ត្រ ព្រោះពួកគេ បានចាញ់ក្រុមខេត្តព្រៃវែង ៣-១ ផ្ទុយពី វិសាខា ដែលបានឈ្នះក្រុមខេត្តព្រៃវែង ៣-១។
ជាមួយការប្រជែងនេះ ក្រុមទាំង២ បានប្រឹងប្រែងបង្កើតឱកាសរករៀងខ្លួន តាមរយៈការវាយបកគ្នាទៅវិញទៅមកគួរឱ្យជក់ចិត្ត ប៉ុន្តែមិនមានគ្រាប់បាល់ណាមួយ នៅក្នុងតង់ទី១ បានកើតឡើងនោះទេ ប៉ុន្តែសម្រាប់បឹងកេត បានជួបនៅរឿងដ៏គួរឱ្យសោកស្តាយមួយ នៅពេលខ្សែប្រយុទ្ធឆ្នើមរបស់ខ្លួន បានភ្លាត់ជើងដួល បណ្តាលឱ្យមានបញ្ហារបួសជង្គង់ ហើយត្រូវបានសែងចេញ មិនអាចបន្តការប្រកួតទៀតបាន នៅក្នុងនាទីទី៣០នោះ។
យ៉ាងណាក៏ដោយ បឹងកេត នៅតែអាចរកបានគ្រាប់បាល់នាំមុខ វិសាខា នៅនាទីទី៥១ ជាមួយគ្រាប់បាល់ស៊ុតបញ្ចូលទីរបស់ខ្សែប្រយុទ្ធ Abee ប៉ុន្តែ១០នាទីក្រោយមក កែវ សុខផេង បានស៊ុតតាមស្មើឱ្យ វិសាខា វិញ។ ទោះយ៉ាងណា អតីតខ្សែប្រយុទ្ធវិសាខា Ajayi បានជួយឱ្យ បឹងកេត នាំមុខ ២-១ ជាថ្មីម្តងទៀត នៅនាទីទី៩០ តែ ទិត្យ ឌីណា បានស៊ុតបាល់បញ្ចូលទីពីចម្ងាយ ជួយឱ្យ វិសាខា តាមស្មើ ២-២ វិញ នៅក្នុងនាទីទី ៩០+៣។
ជាមួយលទ្ធផលស្មើគ្នាជាលើកទី២នេះ ខ្សែប្រយុទ្ធ Athiu Kenjok Wal បានទទួលការបាល់បោះកាត់ចូលក្នុងតំបន់គ្រោះថ្នាក់យ៉ាងស្អាតរបស់ កែវ សុខផេង ហើយរូបគេ បានអូសបាល់នោះយ៉ាងលឿនឆ្លងផុត ការតាមបិទរបស់ខ្សែការពារ បឹងកេត រួចស៊ុតបញ្ចូលទីយ៉ាងល្អ នៅក្នុងនាទីទី ៩០+៥ ដើម្បីជួយឱ្យ វិសាខា យកឈ្នះបឹងកេត ៣-២។
តាមរយៈជ័យជម្នះនេះ វិសាខា បានទទួលលេខ១ប្រចាំពូលBនេះ ដោយឈ្នះទាំង២លើក ហើយពួកគេ នឹងត្រូវឡើងទៅជួបក្រុមលេខ២ពូលA កងយោធពលខេមរភូមិន្ទ នៅវគ្គពាក់កណ្តាលផ្តាច់ព្រ័ត្រ ដែលត្រូវធ្វើនៅថ្ងៃទី៣១ ខែមករានេះ ចំណែកក្រុមខេត្តព្រៃវែង ត្រូវឡើងទៅជួបក្រុមលេខ១ពូលA ភ្នំពេញក្រោន ប៉ុន្តែ បឹងកេត បានធ្លាក់ចេញពីការប្រកួតនេះ ដូចក្រុមគិរីវង់សុខសែនជ័យដែរ។
ងាយកមកចាប់អារម្មណ៍ពីរបួសរបស់ខ្សែប្រយុទ្ធ ចាន់ វឌ្ឍនាកា វិញ នៅមិនទាន់ដឹងច្បាស់ថា នឹងវិវឌ្ឍទៅជាបែបណានោះទេ ហើយជាមួយគ្នានេះ វឌ្ឍនាកា បានសរសេរបង្ហោះនៅលើផេចហ្វេសប៊ុករបស់ខ្លួនថា៖«កីឡាករ គឺតែងតែប្រឈមនឹងបញ្ហារបួស អរគុណគ្រប់គ្នាដែលបារម្ភពីស្ថានភាពរបួសរបស់ខ្ញុំ។ ខ្ញុំក៏សង្ឃឹមដូចគ្នាថា នឹងមិនមានអ្វីធ្ងន់ធ្ងរទៅចុះ អ្វីៗគឺរង់ចាំលទ្ធផល នឹងការពិភាក្សាជាមួយក្រុមគ្រូពេទ្យបន្តទៀត»៕
