ខ្សែប្រយុទ្ធដ៏ឆ្នើម ចាន់ វឌ្ឍនាកា បានទទួលជោគជ័យ១០០ភាគរយ ទៅលើការវះកាត់របួសសសៃពួរជង្គង់ខាងស្តាំ ដែលបានកើតមានឡើង នៅក្នុងការប្រកួតបាល់ទាត់ពានរង្វាន់ Prince Beer Pre-Season Cup 2022 កាលពីថ្ងៃទី២៦ ខែមករា ឆ្នាំ២០២២ ប៉ុន្តែឱកាសអាចបង្ហាញខ្លួននៅលើទីលានសារឡើងវិញ របស់ ចាន់ វឌ្ឍនាកា នៅរដូវកាល ឆ្នាំ២០២២នេះ កំពុងស្ថិតនៅលើភាពមិនច្បាស់លាស់។
«អរគុណគ្រប់គ្នា សម្រាប់ការជូនពរ ពេលនេះការវះកាត់សសៃពួរជើងខាងស្ដាំ (ACL) របស់ខ្ញុំ ត្រូវបានបញ្ចប់ និងជោគជ័យ 100% អរគុណថ្នាក់ដឹកនាំ ក្រុមគ្រូពេទ្យ នឹង អរគុណអ្នកគាំទ្រទាំងអស់គ្នា» នេះជាសារស័ព្ទរបស់ ចាន់ វឌ្ឍនាកា បានសរសេរបង្ហោះនៅលើផេចហ្វេសប៊ុករបស់គេ ក្រោយការវះកាត់រួចរាល់ កាលពីថ្ងៃសៅរ៍ ទី៥ ខែកុម្ភៈ ឆ្នាំ២០២២នេះ។
ជាមួយគ្នានេះ ក្លិបបឹងកេត បានប្រកាស កាលពីថ្ងៃសៅរ៍នោះដែរថា៖ «កីឡាករ ចាន់ វឌ្ឍនាកា ទទួលបានការវះកាត់ប្រកបដោយជោគជ័យ នារសៀលនេះ។ ជូនពរឱ្យឆាប់ជាសះស្បើយ នឹងត្រឡប់ចូលមកកាន់ទីលានវិញ»។
យ៉ាងណាក៏ដោយ សម្រាប់ឱកាសបានវិលត្រឡប់មកប្រកួតជាថ្មីរបស់ ចាន់ វឌ្ឍនាកា ក្នុងរដូវកាលថ្មី ឆ្នាំ២០២២នេះ បានស្ថិតនៅក្នុងភាពមិនច្បាស់លាស់ ខណៈអ្នកទស្សនាភាគច្រើន បានមើលឃើញថា ខ្សែប្រយុទ្ធរបស់បឹងកេត រូបនេះ មានភាគរយតិចណាស់ ឬមិនអាចមានតែម្តង សម្រាប់ការបានបង្ហាញខ្លួន នៅក្នុងការប្រកួតប្រជែង នៅឆ្នាំនេះ។
នៅមុនការវះកាត់ ចាន់ វឌ្ឍនាកា ខ្លួនឯងផ្ទាល់ បានអះអាងប្រាកដដោយភាពជឿជាក់ថា យ៉ាងយូរ៦ខែ បន្ទាប់ពីការវះកាត់ហើយ រូបគេនឹងវិលមកជួបអ្នកគាំទ្រជាថ្មីម្តងទៀត គឺមានន័យថា នៅក្នុងកំឡុង ខែកក្កដា ឆ្នាំ២០២២នេះ។ តែទោះបីជាយ៉ាងណា គេជឿថា ការវិលមកនេះ គឺ វឌ្ឍនាកា បានត្រឹមហាត់សម្រួលសសៃ និងចលនា ឡើងវិញបន្តិចបន្តួចប៉ុណ្ណោះ។
ម្ចាស់អាវលេង១១ ចាន់ វឌ្ឍនាកា អាចនឹងចំណាយពេលច្រើនខែទៀត ក្នុងការធ្វើឱ្យរាងកាយរបស់គេ វិលទៅរកភាពប្រសើរវិញ និងអាចធ្វើការហ្វឹកហាត់បានពេញលេញដូចធម្មតា អ៊ីចឹងទម្រាំអ្វីៗបានប្រសើរ១០០ភាគរយវិញ គឺឱកាសបង្ហាញខ្លួន សម្រាប់ការប្រកួតផ្លូវការ ក្នុងរដូវកាល ឆ្នាំ២០២២នេះ របស់ វឌ្ឍនាកា អាចនឹងមិនមាន។ តែបើមាន គឺអាច នៅចុងរដូវកាល នឹងអាចចូលរួម ក្នុងនាមជាកីឡាករបម្រុងតែប៉ុណ្ណោះ៕
