ខ្សែប្រយុទ្ធឆ្នើមរបស់ក្រុមបឹងកេត ចាន់ វឌ្ឍនាកា ដែលទើបក្រសោបបានភាពល្បីល្បាញជាថ្មី ដើម្បីបានចូលលេងឱ្យក្រុមជម្រើសជាតិកម្ពុជា ឡើងវិញនោះ នឹងត្រូវបាត់មុខពីលើទីលានប្រកួតយ៉ាងតិច៦ខែ ខណៈរូបគេ ត្រូវធ្វើការវះកាត់ជង្គង់ស្តាំ ដែលទើបមានរបួស នៅក្នុងការប្រកួតពានបើករដូវកាល ឆ្នាំ២០២២ កាលពីថ្ងៃពុធម្សិលមិញ។
ម្ចាស់អាវលេខ១១ ចាន់ វឌ្ឍនាកា ត្រូវបានសែងចេញពីទីលាន នៅនាទីទី៣០ បន្ទាប់ពីរូបគេបានដួលតែម្នាក់ឯង ក្រោយរត់ទៅប៉ះ អ៊ិន សូដាវីត និងបានបង្ហាញការឈឺចាប់ខ្លាំង នៅត្រង់ជង្គង់ស្តាំ នៅពេលក្រុមបឹងកេត បានចាញ់ក្រុមវិសាខា ៣-២ ហើយបានធ្លាក់ចេញពីការប្រកួតបាល់ទាត់ពានរង្វាន់ Prince Beer Pre-Season Cup 2022 កាលពីថ្ងៃពុធ។
ជាមួយបញ្ហារបួសនេះ ក្លិបបឹងកេត នៅល្ងាចថ្ងៃព្រហស្បតិ៍ ទី២៧ ខែមករា នេះ បានប្រកាស នៅលើផេចហ្វេសប៊ុករបស់ខ្លួនថា ចាន់ វឌ្ឍនាកា ត្រូវធ្វើការវះកាត់ជង្គង់ក្រោយរងរបួសក្នុងការប្រកួតម្សិលមិញ។
«បន្ទាប់ពីធ្វើការតាមដានពិនិត្យយ៉ាងម៉ត់ចត់ និងយកចិត្តទុកដាក់ពីគ្រូពេទ្យឯកទេស ជាលទ្ធផល ស្ថានភាពរបួសបានឱ្យឃើញថា វឌ្ឍនាកា បានដាច់សរសៃរជង្គង់ខាងស្ដាំ ACL (Anterior Cruciate Ligament)។ ខណ:ពេលនេះ ក្លិបកំពុងរៀបចំ ដើម្បីឱ្យគាត់បានធ្វើការវះកាត់ ជូនពរឱ្យការវះកាត់ទទួលបានជោគជ័យ និងជាសះស្បើយបានឆាប់រហ័ស»។ ក្លិបបឹងកេត បានប្រកាស។
ជាមួយការជួបហេតុការណ៍ដ៏អាក្រក់ ដែលឈានទៅដល់ការវះកាត់នេះ ខ្សែប្រយុទ្ធ ចាន់ វឌ្ឍនាកា បានប្រាប់ទៅកាន់អ្នកគាំទ្រថា សូមកុំឱ្យមានការតក់ស្លុត និងភ័យខ្លាចទៅលើការវះកាត់របស់គេនេះ ដោយគេបានបង្ហើបថា យ៉ាងយូរ៦ខែទៀត រូបគេ នឹងអាចវិលមកកាន់ទីលានវិញ បើសិនជាការវះកាត់លើកនេះ ទទួលបានជោគជ័យ។
«កុំមានការតក់ស្លុតកុំមានការភ័យខ្លាច ខ្ញុំគ្រាន់តែសម្រាកមួយពេលប៉ុណ្ណោះ វាគ្រាន់តែជាការវះកាត់តូចមួយប៉ុណ្ណោះ សម្រាប់ខ្ញុំ! ខ្ញុំមិនខ្លាច ខ្ញុំធ្លាប់នៅក្រៅទីលានដោយមិនបានប្រកួត៦ខែ ទៅ៧ខែ តែខ្ញុំអាចត្រឡប់មកវិញបាន ចុះគ្រាន់តែរបួសប៉ុននេះ ចង់មករារាំងផ្លូវជីវិតរបស់ខ្ញុំ មិនអាចទៅរួចទេ អរគុណអ្នកគ្រប់គ្នាផ្ដល់កម្លាំងចិត្តនឹងលើកទឹកចិត្តខ្ញុំ ជួបគ្នា៦ខែទៀតក្រោយការវះកាត់ជោគជ័យ»។
ចាន់ វឌ្ឍនាកា បានសរសេរបែបនេះ នៅលើផេចហ្វេសប៊ុករបស់ខ្លួន ក្រោយដឹងដំណឹងថា រូបគេ ត្រូវធ្វើការវះកាត់ជង្គង់។ ជាមួយដំណឹងដ៏អាក្រក់នេះ គ្រប់គ្នានៅក្នុងវិស័យបាល់ទាត់ រួមទាំងអ្នកគាំទ្រ បាននាំគ្នា បួងសួងឱ្យខ្សែប្រយុទ្ធឆ្នើមរូបនេះ ទទួលបានជោគជ័យក្នុងការវះកាត់ និងឆាប់បានជាសះស្បើយ ដើម្បីអាចវិលមកកាន់ទីលានប្រកួតវិញ៕