កីឡាករជើងថ្មីកំពុងសាងបានភាពល្បីល្បាញ សូត្រ វាសនា បានអះអាងថា រូបគេនឹងប្រឹងប្រែងប្រកួតឱ្យអស់ពីលទ្ធភាព ដើម្បីបំបែកកំណត់ត្រាយកឈ្នះជើងខ្លាំង វេង សុភ័ក្រ ឱ្យបានម្តង បើទោះបីជាពេលនេះ រូបគេ និង វេង សុភ័ក្រ សុទ្ធតែមានពិន្ទុគ្រប់គ្រាន់ បានឡើងទៅវគ្គពាក់កណ្តាលដោយស្វ័យប្រវត្តិដូចគ្នាក៏ដោយ។
បើទោះបីជាការប្រកួតជម្រុះវិលជុំប្រចាំពូលA ចំនួន២លើក កន្លងមកនេះ សូត្រ វាសនា បានផ្តួលឱ្យ ជ័រ ពៅ សន្លប់ត្រឹមទឹកទី១ និងបានបន្តបុកជង្គង់ផ្តួលកីឡាករជើងចាស់ ម៉ន សាម៉េត ឱ្យសន្លប់ នៅទឹកទី៣ ដើម្បីឈរនៅលេខ១ ជាបណ្តោះអាសន្ន ប៉ុន្តែ សូត្រ វាសនា បានចាត់ទុក វេង សុភ័ក្រ គឺជាជើងខ្លាំង ដែលរូបគេធ្លាប់បានចាញ់ចំនួន២លើកមកហើយ។
«ខ្ញុំធ្លាប់ជួប វែង សុភ័ក្រ ២ដងហើយ ហើយបានចាញ់គាត់ ទាំង២លើក ព្រោះគាត់ល្អចាប់ តែបើជុំទី៣នេះ ខ្ញុំអាចធ្វើបាន៣ពិន្ទុបន្ថែមទៀត ខ្ញុំមានសង្ឃឹមច្រើន។ នេះជាការលើកឡើងរបស់ សូត្រ វាសនា ហើយរូបគេបានបន្តថា៖ «ការប្រកួត យើងមិនអាចមើលឃើញទេ គឺបើផ្តាច់បាន យើងនឹងផ្តាច់ តែបើផ្តាច់មិនបាន យើងនឹងវ៉ៃមួយៗយកពិន្ទុ»។
ជាមួយគ្នានេះ សូត្រ វាសនា ក៏ហាក់បារម្ភទៅលើការសម្រកទម្ងន់ពី៦៤គីឡូក្រាម មកប្រកួតក្នុងទម្ងន់៦០គីឡូក្រាម នៅក្នុងការប្រកួតជម្រុះដណ្តើមពានមាស នៅលើសង្វៀនថោន នាថ្ងៃអាទិត្យនេះ ផងដែរ ប៉ុន្តែរូបគេបានតាំងចិត្តថា នឹងខំប្រឹងប្រែង ដើម្បីបំបែកកំណត់ត្រាយកឈ្នះ វេង សុភ័ក្រ ឱ្យបានម្តង។
កីឡាករវ័យក្មេងរូបនេះ បានបញ្ជាក់ថា៖ «ខ្ញុំមានការបារម្ភទៅលើគីឡូ ព្រោះគីឡូរបស់ខ្ញុំ៦៤ដែរ ហើយពេលយើងធ្វើគីឡូ (សម្រក) ពេលខ្លះទៅ អត់សូវមានកម្លាំងវ៉ៃ ប៉ុន្តែខ្ញុំនឹងខំប្រឹងប្រកួតឱ្យអស់ពីសមត្ថភាព។ ទោះបីជា ខ្ញុំមានពិន្ទុគ្រប់គ្រាន់ បានឡើងទៅវគ្គបន្ត ដោយស្វ័យប្រវត្តិ តែសម្រាប់ខ្ញុំ ត្រូវខំប្រឹងបំបែកកំណត់ត្រាយកឈ្នះ វេង សុភ័ក្រ ឱ្យបានម្តងវិញ»។
យ៉ាងណាក៏ដោយ ការតាំងចិត្តស្វែងរកជ័យជម្នះរបស់ សូត្រ វាសនា ត្រូវបានគេមើលឃើញថា អាចមានការលំបាកខ្លាំង។ បើទោះបីជា វេង សុភ័ក្រ បានឈ្នះ ម៉ន សាម៉េត ត្រឹមពិន្ទុ និងផ្តួល ជ័រ ពៅ ក្នុងទឹកទឹកទី៣ គឺចាញ់ប្រៀប សូត្រ វាសនា ដែលធ្វើបានល្អជាង ប៉ុន្តែ វេង សុភ័ក្រ ជាកីឡាករមានបទពិសោធ និងល្បិចប្រកួតខ្ពស់ជាង សូត្រ វាសនា ហើយកម្លាំង និងបច្ចេកទេសប្រកួតរបស់ សុភ័ក្រ ក៏មិននៅក្រោម វាសនា នោះដែរ ហេតុនេះសម្រាប់អ្នកគាំទ្រ នៅតែផ្តល់ទំនុកចិត្តច្រើនជាងទៅលើ វេង សុភ័ក្រ។
ដោយឡែកកីឡាករ ម៉ន សាម៉េត និង ជ័រ ពៅ ក៏ត្រូវប្រកួតជម្រុះលើកចុងក្រោយប្រចាំពូលA នៅរសៀលថ្ងៃអាទិត្យនេះដែរ ប៉ុន្តែនេះគ្រាន់តែជាការប្រកួតបង្រ្គប់កិច្ចតែប៉ុណ្ណោះ ព្រោះអ្នកទាំង២នេះ បានធ្លាក់ចេញពីការប្រកួតនេះ ដោយស្វ័យប្រវត្តិរួចទៅហើយ៕