កីឡាករជើងថ្មី កំពុងល្បីខ្លាំង សូត្រ វាសនា បានធ្វើឱ្យគ្រប់គ្នា ស្ទើតែមិនជឿ នៅហេតុការណ៍ ដែលរូបគេបានបង្កើតឡើង នៅក្នុងការប្រកួតវគ្គពាក់កណ្តាលផ្តាច់ព្រ័ត្រ នៅលើសង្វៀនថោន ខណៈពូជអ្នកប្រដាល់របស់ត្រកូល «សូត្រ» រូបនេះ អាចឥផ្តួលជើងខ្លាំង វ៉ាន់ វឿន ដោយប្រើពេលត្រឹម២នាទីនោះ។
វាពិតជាអស្ចារ្យខ្លាំង នៅពេល សូត្រ វាសនា មិនបានបង្ហាញការឈឺសោះ ទៅនឹងការទាត់ ម៉ាត់ និងបុកជង្គង់របស់អ្នកលេងកាំភ្លើងភ្លោះ វ៉ាន់ វឿន គឺ វាសនា ពិតជាមានភាពរឹងមាំ ដែលធ្វើឱ្យគ្រប់គ្នា ស្ទើតែមិនជឿ ហើយបន្ថែមលើនេះ រូបគេបានវ៉ៃសងទៅលើ វ៉ាន់ វឿន យ៉ាងរន្ធើន និងមានទម្ងន់ធ្ងន់ៗ។
ទោះបីជា វ៉ាន់ វឿន បានបង្ហាញភាពហានក្លា ក្នុងការចូលវាយប្តូរ ប៉ុន្តែការទាត់ឆ្វេងខ្លាំងៗ ទៅដល់ជង្គង់ក្រោម បានធ្វើឱ្យ វ៉ាន់ វឿន ដួលដេក បង្ហាញការឈឺយ៉ាងខ្លាំង ទៅលើជើងស្តាំ គឺមិនអាចក្រោក បន្តការប្រកួតទៀតបានឡើង ហើយអាចថា ជាលើកដំបូង ផងដែរ ដែល វ៉ាន់ វឿន ចាញ់ ដោយផុយស្រួច និងលឿនបែបនេះ។
ជុំវិញការផ្តួល វ៉ាន់ វឿន ដោយប្រើពេលសរុបត្រឹម២នាទី នៅក្នុងទឹកទី១នេះ សូត្រ វាសនា បាននិយាយ ក្រោយការប្រកួតថា៖ «ខ្ញុំធ្លាប់ចាញ់ វ៉ាន់ វឿន ២លើកមកហើយ ប៉ុន្តែការប្រកួតនេះ ខ្ញុំមិនមានការបារម្ភណាស់ណានោះទេ ព្រោះប៉ារបស់ខ្ញុំ (លោក សួន ប៊ុនសូត្រ) និងបងប្រុសរបស់ខ្ញុំ (សូត្រ ប៊ុនធី និង សូត្រ ខេវិន) បានលត់ដំខ្ញុំរហូត សម្រាប់ការហ្វឹកហាត់ ត្រៀមការប្រកួតនេះ។ពួកគាត់ ឱ្យខ្ញុំបុកហ្វឹកហាត់ខ្លាំង ទាំងទៅលើការឡាំ ការវ៉ៃ និងរត់យកកម្លាំងសុហ្វ»។
តាមរយៈការផ្តួល វ៉ាន់ វឿន នៅវគ្គពាក់កណ្តាលផ្តាច់ព្រ័ត្រនេះ សូត្រ វាសនា នឹងត្រូវឡើងទៅជួបគូសត្រូវចាស់ ឈុត សេរីវ៉ាន់ថង នៅវគ្គផ្តាច់ព្រ័ត្រ ព្រោះកាលពីថ្ងៃអាទិត្យម្សិលមិញនោះដែរ វ៉ាន់ថង បានយកឈ្នះ វេង សុភ័ក្រ ដោយពិន្ទុ យ៉ាងតានតឹងបំផុត៕