បរទេស៖ Leeds United និង Monaco បានដាក់សំណើរសម្រាប់ការផ្ទេរយក Takumi Minamino ប៉ុន្តែត្រូវបានហង្សក្រហម Liverpool បដិសេធដោយក្រុមការពារតំណែងជើងឯកអង់គ្លេសមិនមានបំណងអោយកីឡាករអន្តរជាតិជប៉ុនរូបនេះ ចាកចេញក្នុងខែមករានៅឡើយទេ។
ខ្សែបម្រើ-ប្រយុទ្ធវ័យ២៧ ឆ្នាំរូបនេះបានតស៊ូបង្ហាញខ្លួន ជម្រើស១១នាក់ ទៀងទាត់ក្រោមការដឹកនាំរបស់លោក Jurgen Klopp ដោយចាប់ផ្តើមបានត្រឹមតែ ៦ ដងប៉ុណ្ណោះក្នុង១៨ លើក គ្រប់ការប្រកួតទាំងអស់នៅរដូវកាលនេះ។
Liverpool បានផ្ទេរយកកីឡាករអន្តរជាតិជប៉ុនរូបនេះពីក្លឹបជើងឯកអូទ្រីស Red Bull Salzburg ក្នុងខែមករាឆ្នាំ ២០២០ ក្នុងតម្លៃ៧.២៥ លានផោន ប៉ុន្តែ Minamino បានចូលរួមជាមួយ Southampton ក្នុងលក្ខខណ្ឌខ្ចីជើង នៃរដូវកាលមុនដោយស៊ុតបញ្ចូលទីបាន ២ គ្រាប់ក្នុងការបង្ហាញខ្លួន ១០ លើកមុននឹងត្រលប់ទៅ Anfield វិញនៅដើមរដូវកាលនេះ ។ កីឡាករពាក់អាវស្លាកលេខ ១៨ របស់ Liverpool ក៏បានបង្ហាញខ្លួនសរុបចំនួន ៤៩ លើក និងស៊ុតបញ្ចូលទីបាន ១០ គ្រាប់ក្នុងនោះមាន ៤ គ្រាប់នៅក្នុង EFL Cup រដូវកាលនេះ៕
ប្រភពព័ត៍មាន៖ Sportsmole
