អ្នកលេងស្នៀតជើង អេលីត សុខហ៊ុច (មឿន សុខហ៊ុច) ត្រូវបានដាក់ឱ្យដណ្តើមប្រាក់លាន នៅលើសង្វៀនថោន នាថ្ងៃអាទិត្យនេះ ជាលើកដំបូង ដោយរូបគេ ត្រូវជួបជាមួយដៃគូចាស់ ឡុង សំណាង និង សួន ចាន់នី (សូត្រ ប៊ុនធី) ព្រមទាំងកីឡាករជើងថ្មី រិទ្ធ ប៊ុនម៉ៅ។
នៅក្នុងចំណោមបេក្ខភាពទាំង៤នេះ មឿន សុខហ៊ុច, សូត្រ ប៊ុនធី និង ឡុង សំណាង ធ្លាប់ជួបគ្នាញឹកញ៉ាប់ ដោយបានឈ្នះ ចាញ់គ្នាទៅវិញទៅមក ហើយអ្នកទាំង៣នេះ ត្រូវបានគេមើលឃើញថា អាចនឹងម្នាក់មាន១ ត្រូវឈ្នះប្រាក់លានលើកនេះ ចំណែក រិទ្ធ ប៊ុនម៉ៅ មិនត្រូវបានគេផ្តល់ទំនុកចិត្តនោះដែរ។
យ៉ាងណាក៏ដោយ សម្រាប់ សួន ចាន់នី មិនបានគិតថា ឡុង សំណាង និង រិទ្ធ ប៊ុនម៉ៅ ជាឧបសគ្គរបស់គេនោះទេ គឺកីឡាករមានរហ័ស្សនាម «លោកមេទ័ព» រូបនេះ បានចាប់អារម្មណ៍ខ្លាំងតែទៅលើ មឿន សុខហ៊ុច ព្រោះ ចាន់នី មើលឃើញថា ក្បាច់វាយចេញរបស់ សុខហ៊ុច មានភាពរញ៉េរញ៉ាយ ពិបាកស្មាន និងពិបាកចូលវាយលុក។
សួន ចាន់នី បាននិយាយថា៖ «នៅក្នុងចំណោម៣នាក់នេះ ខ្ញុំធ្លាប់ប៉ះ ឡុង សំណាង និង មឿន សុខហ៊ុច តែមិនធ្លាប់ជួប រិទ្ធ ប៊ុនម៉ៅ នោះទេ។ តែទោះបីជាយ៉ាងណា អ្នកដែលត្រូវតតាំងគ្នាខ្លាំង មានតែមួយទេ គឺ មឿន សុខហ៊ុច ដែលជំនួប៣ទៅ៤លើកកន្លងមកនេះ បានឈ្នះ និងចាញ់គ្នាទៅវិញទៅមក»។
កីឡាកររូបនេះ បានបន្ថែមថា៖«ក្បាច់របស់គាត់ វ៉ៃរញ៉េរញ៉ាយ គឺពេលខ្លះការទាត់របស់គាត់ប្រូសប្រាស់ៗ ដល់អ៊ីចឹងពេលយើងចូលទៅពិបាកវ៉ៃជាមួយគាត់។ និយាយទៅ គាត់ចេះតែវ៉ៃទៅ ឱ្យតែបានចេញច្រើន ដោយគាត់មិនដឹងថា ត្រូវ ឬមិនត្រូវនោះទេ ចេះតែវ៉ៃទៅ!»។
សូត្រ ប៊ុនធី ដែលធ្លាប់បានឈ្នះប្រាក់លាននេះម្តង បានបញ្ជាក់ថា៖ «ម្យ៉ាងទៀត នេះជាការប្រកួត៣ទឹក ដែលវាលឿនពេក។ បើវ៉ៃ៥ទឹក យើងអាចសង្ឃឹម តែវ៉ៃ៣ទឹក ពេលខ្លះកីឡាករវ៉ៃយកៗ អាចមានការពិបាកដែរ ហេតុនេះ សម្រាប់ការប្រកួតដណ្តើមប្រាក់លាន ជាលើកទី៤នេះ ខ្ញុំសង្ឃឹមត្រឹម៦០ភាគរយសិនបានហើយ រីឯ៤០ភាគរយទៀត ទុកឱ្យអ្នកគាំទ្ររបស់ខ្ញុំ ផ្តល់កម្លាំងចិត្តឱ្យខ្ញុំ»។
ចំណែក មឿន សុខហ៊ុច ក៏បានគិតថា មានការពិបាកផងដែរ សម្រាប់ការចូលរួមការប្រកួតដណ្តើមប្រាក់លាន ជាលើកដំបូងនេះ ប៉ុន្តែកីឡាករជំនាញខាងទាត់រូបនេះ បានប្តេជ្ញាថា នឹងខំប្រឹង ធ្វើយ៉ាងណា ដណ្តើមយកប្រាក់រង្វាន់លេខ១ ចំនួន ៣,៤ លានរៀល នេះឱ្យបាន។
មឿន សុខហ៊ុច បាននិយាយថា៖ «នេះជាលើកទី១ ដែលខ្ញុំបានចូលប្រកួតដណ្តើមប្រាក់លាន ហើយខ្ញុំបានត្រៀមខ្លួន២សប្តាហ៍ហើយ។ ទាំង ឡុង សំណាង និង សូត្រ ប៊ុនធី ខ្ញុំសុទ្ធតែធ្លាប់ជួប ហើយខ្ញុំគិតថា វានៅតែមានភាពតានតឹង ព្រោះពួកយើង ធ្លាប់ឈ្នះ ចាញ់គ្នាទៅវិញទៅមក»។
«តែទោះបីជាយ៉ាងណា តាមរយៈការប្រកួតប៉ុន្មានលើកចុងក្រោយនេះ ខ្ញុំធ្វើបានគ្រាន់បើច្រើន អ៊ីចឹងខ្ញុំគិតថា មិនអីទេ អាចវ៉ៃបាន ព្រោះកម្លាំងធម្មតា ហើយខ្ញុំប្តេជ្ញាចិត្តយកប្រាក់លាននេះឱ្យបាន ដោយសង្ឃឹម៧០ភាគរយ»។ មឿន សុខហ៊ុច បានបញ្ជាក់បន្ថែម ទៅលើការប្តេជ្ញាចិត្ត សម្រាប់ការប្រកួតលើកនេះ៕