ក្តីសង្ឃឹម ក្នុងការប្រជែងយកពានរបស់ក្រុមកងយោធពលខេមរភូមិន្ទ (ទ័ព) ត្រូវបានរលាយបាត់ ក្រោមការស៊ុតត្រឹម១គ្រាប់គត់របស់កីឡាករវ័យក្មេង សំអុល ទីណា ហើយគ្រាប់បាល់នេះ បានជួយឱ្យក្រុមភ្នំពេញក្រោន ក្លាយជាម្ចាស់ជើងឯក នៅក្នុងការប្រកួតពានរង្វាន់ Prince Beer Pre-Season Cup 2022។
តាមរយៈការប្រកួតផ្តាច់ព្រ័ត្រ នៅកីឡដ្ឋានព្រីនស៍ កាលពីព្រលប់ថ្ងៃពុធ ម្សិលមិញនេះ ពិតជាមានភាពតានតឹងខ្លាំង ព្រោះទាំងក្រុមភ្នំពេញក្រោន និងក្រុមទ័ព សុទ្ធតែបង្កើតឱកាស ក្នុងការរកគ្រាប់ ប៉ុន្តែក្រុមទាំង២នេះ មិនអាចរកបានគ្រាប់បាល់ដូចគ្នា សម្រាប់ការប្រកួត៤៥នាទី នៅក្នុងតង់ទី១។
យ៉ាងណាក៏ដោយ ការលើកបាល់ចាក់ចូលមុខទីយ៉ាងស្អាតរបស់ យ៉ើ ម៉ូស្លីម បានផ្តល់ឱកាសឱ្យ សំអុល ទីណា លោតតែតបាល់នោះ ផុតដៃអ្នកចាំទី អ៊ុំ វិចិត្រ បញ្ចូលទីយ៉ាងល្អ ដើម្បីជួយឱ្យក្រុមភ្នំពេញក្រោន នាំមុខ ១-០ នៅនាទីទី៥៥ ហើយក្រោមកទៀត ភ្នំពេញក្រោន ក៏ទទួលបានឱកាសពិសេសមួយទៀតផងដែរ នៅពេលអាជ្ញាកណ្តាលផ្តល់បាល់ពិន័យ១១ម៉ែត្រឱ្យ ប៉ុន្តែ អ៊ុំ វិចិត្រ បានជួយសង្រ្គោះគ្រាប់បាល់ ដែលស៊ុតដោយខ្សែប្រយុទ្ធ ប្រាក់ ធីវ៉ា បានសម្រេច។
តែទោះបីជាយ៉ាងណា ក្រុមទ័ព មិនអាចរកបានគ្រាប់បាល់តាមស្មើ បាននោះទេ ដោយពួកគេ បានបន្តចាញ់ក្រុមភ្នំពេញក្រោន ១-០ ដូចការជួបគ្នា កាលនៅវគ្គជម្រុះដែរ។ លទ្ធផលនេះ ជួយឱ្យក្រុមភ្នំពេញក្រោន បានបន្តលើកពានបើករដូវកាលជាថ្មីម្តងទៀត ហើយចំថ្ងៃពិសេសទៅទៀត គឺថ្ងៃទី២ ខែ២ ឆ្នាំ២០២២។
ជាមួយការឈ្នះបានពានបើករដូវកាលនេះ ភ្នំពេញក្រោន ទទួលបានប្រាក់រង្វាន់ចំនួន១២លានរៀល ខណៈក្រុមជើងឯករង ទ័ព បាន៨លានរៀល ចំណែកអ្នកចាំទីល្អជាងគេ ដែលទទួលបានស្រោមដៃមាសប្រចាំព្រឹត្តិការណ៍នេះ បានទៅអ្នកចាំទីរបស់ក្រុមភ្នំពេញក្រោន សាវែង សំណាង ហើយពានអ្នកស៊ុតបាល់បញ្ចូលទីបានច្រើនជាងគេ បានទៅលើខ្សែប្រយុទ្ធជប៉ុនរបស់ក្រុមទ័ព Takumu Nishihara (រកបាន៣គ្រាប់) ដោយអ្នកទាំង២នេះ ទទួលបានប្រាក់រង្វាន់ចំនួន ១,៥លានរៀលដូចគ្នា៕
