បរទេស៖ លោក Pep Guardiola បានផ្តល់សារព្រមានថា នៅសល់ឧបសគ្គជាច្រើនទៀតដែលនៅតែស្ថិតនៅចំពោះក្រុម Manchester City និងការឈ្នះពានក្របខ័ណ្ឌ Premier League ជាលើកទី៤ក្នុងរយៈពេល៥ឆ្នាំ ក្រោយពីបានយកឈ្នះលើក្រុម Brentford ក្នុងលទ្ធផល ២-០ ដើម្បីនាំមុខ ១២ពិន្ទុដាច់នៅលើកំពូលតារាង កាលពីថ្ងៃពុធ។
Liverpool នៅសល់២ប្រកួតក្នុងដៃ ដើម្បីព្យាយាមកាត់បន្ថយពិន្ទុដេញតាមពីក្រោយ ប៉ុន្តែ Man City បានបាត់បង់ត្រឹមតែ២ពិន្ទុគត់ ក្នុងការប្រកួតលីកចំនួន១៤លើក បើគិតចាប់តាំងពីខែតុលា។ ក្រុមរបស់លោក Guardiola មិនបានស្ថិតក្នុងទម្រង់លេងយ៉ាងល្អឥតខ្ចោះរបស់ខ្លួននាកីឡដ្ឋាន Etihad ប៉ុន្តែ នៅតែជាក្រុមខ្លាំងជាងសម្រាប់ Brentford ដែលកំពុងប្រឈមមុខនឹងការធ្លាក់ទៅកាន់តំបន់កាត់ចោល។ លោក Guardiola បានឲ្យដឹងថា៖ «ពួកគេជាក្រុមដ៏រឹងមាំក្នុងការវាយសម្រុក។
អ្នកត្រូវតែមានការអត់ធ្មត់ មិនត្រូវធ្វើឲ្យមានកំហុស ហើយទីបំផុត យើងទទួលបានលទ្ធផល»។ ស្របពេលជាមួយគ្នានេះ ការប្រជែងដណ្តើមចំណាត់ថ្នាក់កំពូលទាំង៤របស់ Tottenham បានជួបការខកចិត្ត ក្នុងពេលចាញ់ក្រុម Southampton ក្នុងលទ្ធផល ៣-២៕
ប្រភពព័ត៌មាន៖ Channel News Asia
