បរទេស៖ ក្រុមគ្រួសាររបស់កីឡាករ Abdelhak Nouri និងក្លឹប Ajax បានបញ្ជាក់ពីកិច្ចព្រមព្រៀងមួយត្រូវបានសម្រេចចេញពីតុលាការ ទក់ទងនឹងសំណងដែលនឹងត្រូវបង់ក្នុងទឹកប្រាក់៧.៨៥លានយូរ៉ូបន្ទាប់ពីទទួលគ្រោះថ្នាក់ដោយឧប្បតិហេតុគាំងបេះដូងសន្លប់បាត់ស្មារតីនៅលើទីលានប្រកួតមិត្តភាពជាមួយក្រុម Weder Bremen របស់អាឡឺម៉ង់មុនបើករដូវកាលកាលពីឆ្នាំ២០១៧។
ហេតុការណ៏ដ៏គួរអោយសោកស្តាយសម្រាប់កីឡាករខ្សែបម្រើអន្តរជាតិហូឡង់វ័យក្មេងរូបនេះ បានធ្វើឱ្យពិភពបាល់ទាត់ភ្ញាក់ផ្អើលព្រមជាមួយការសម្តែងសេចក្តីអាណិតដល់រូបគេជាពន់ពេក ខណៈសាម៉ីខ្លួនបច្ចុប្បន្នមាន វ័យ ២៤ឆ្នាំមិនអាចបន្តអាជីពបាល់ទាត់បានទៀតនោះទេ។
នាយកប្រតិបត្តិ Ajax និងជាអតីតអ្នកចាំទីMan.Utd លោក Edwin van der Sar បាននិយាយថា :វា ជាការល្អដែលកិច្ចព្រមព្រៀងមួយត្រូវបានឈានដល់ការព្រមព្រៀងគ្នា យើងទាំងអស់គ្នាដឹងថាការឈឺ ចាប់ សម្រាប់ Abdelhak និងមនុស្សជាទីស្រឡាញ់របស់គាត់មិនទាន់ចប់ទេ។ វានៅតែជាស្ថានភាពដ៏សោកសៅបំផុត ដែលដិតជាប់ក្នុងអារម្មណ៏របស់ពួកយើងរាល់គ្នានៅឡើយ។ មួយវិញទៀតក្រោយមិនអាចប្រកបអាជីពបានបន្តទៀតលេខអាវ៣៤ របស់Nouri នឹងត្រូវដាក់ព្យួរជារៀងរហូត តែអាចនិងផ្តល់ដល់កីឡាករម្តងទៀតទេ លុះត្រាតែគ្រួសារ Nouri និង Ajax មានការព្រមពញរៀងលើកលែងជាមួយគ្នា។ រីឯសម្ភារៈគ្រឿងសង្ហារឹមនៅបន្ទប់ផ្លាស់ស្លៀកពាក់របស់ Abdelhak ក៏នឹងត្រូវបានដាក់នៅក្នុងហាង Ajax Fanshop នៅជាប់ច្រកចូលសំខាន់នៃកីឡាដ្ឋានJohan Cruyff Arena ផងដែរ៕
ប្រភពព័ត៍មាន៖ Goal
