បរទេស៖ ខ្សែបម្រើប្រយុទ្ធដ៏មានឥទ្ធិពល Paulo Dybala នឹងចាកចេញពីក្លិប Juventus នៅចុងរដូវកាលនេះ ក្រោយពីក្លិបស្ថិតក្នុងក្របខ័ណ្ឌ Serie A មួយនេះ បានប្រកាសកាលពីថ្ងៃចន្ទថា ខ្លួននឹងមិនបន្តកុងត្រាថ្មីរូបគេឡើយ ខណៈដែលកុងត្រានឹងផុតកំណត់នៅរដូវក្តៅខាងមុខ។
លោក Maurizio Arrivabene នាយកប្រតិបត្តិក្លិប Juventus បានបញ្ចប់ពាក្យចរចាមអារ៉ាមនានា នៅពេលដែលលោកបានប្រកាសថា ក្លិបនេះ មិនបានផ្តល់សំណើដល់ភ្នាក់ងារតំណាងឲ្យ Dybala ឡើយ អំឡុងពេលនៃកិច្ចប្រជុំ ដែលត្រូវបានរៀបចំឡើងកាលពីថ្ងៃចន្ទ ក្នុងទីក្រុង Turin។ Dybala បានរង់ចាំការពិភាក្សា លើការបន្តកុងងត្រាថ្មី ក្រោយពីកិច្ចព្រមព្រៀងផ្ទាល់មាត់ ត្រូវបានឈានដល់ កាលពីខែតុលា ដែលនឹងធ្វើឲ្យប្រាក់បៀវត្សរ៍គោលរបស់គេកើនដល់៨លានអឺរ៉ូ (ស្មើនឹង៩,១លានដុល្លារអាមេរិក) ក្នុង១រដូវកាល ត្រូវបានប្រែក្រឡាស់ដោយក្លិប។
លោក Arrivabene បានប្រាប់អ្នកយកព័ត៌មានថា៖ «ជាមួយនឹងការមកដល់របស់ខ្សែប្រយុទ្ធ Dusan Vlahovic កាលពីខែមករា រចនាសម្ព័ន្ធកីឡាបាល់ទាត់ក្នុងក្លិបនេះ បានផ្លាស់ប្តូរ។ គម្រោងរបស់ Juventus បានផ្លាស់ប្តូរ និងផ្នែកនៃការផ្លាស់ប្តូរនេះ ក៏រាប់ទាំងកិច្ចសន្យារបស់ Dybala ផងដែរ ដែលថ្ងៃនេះ មិនត្រូវបានបន្តឡើយ»៕
ប្រភពព័ត៌មាន៖ Channel News Asia