បរទេស៖ ក្លិប Roma កាលពីថ្ងៃពុធ បានប្រកាសពីការចុះហត្ថលេខាជាមួយនឹងខ្សែប្រយុទ្ធ Paulo Dybala ក្នុងកិច្ចសន្យារយៈពេល៣ឆ្នាំ ក្រោយពីកុងត្រារបស់តារាឆ្នើមអន្តរជាតិអាហ្សង់ទីនរូបនេះ ជាមួយនឹងក្លិប Juventus បានផុតកំណត់។
Dybala បានឲ្យដឹងក្នុងសេចក្តីថ្លែងការណ៍មួយថា៖ «ខ្ញុំចូលរួមជាមួយនឹងក្រុមមួយដែលកំពុងតែរីកចម្រើន ស្របពេលដែលក្លិបនេះ បន្តបង្កើនការពង្រឹងមូលដ្ឋានគ្រឹះរបស់ខ្លួនសម្រាប់អនាគត ហើយជាមួយនឹងលោកគ្រូបង្វឹក Jose Mourinho ខ្ញុំពិតជាមានសិទ្ធិពិសេសក្នុងការធ្វើការជាមួយ»។ ខ្សែប្រយុទ្ធវ័យ២៨ឆ្នាំរូបនេះ ធ្លាប់ត្រូវបានគេរំពឹងទុកថា នឹងត្រូវផ្ទេរទៅកាន់ក្លិប Inter Milan ដែលជាម្ចាស់ជើងឯករងក្របខ័ណ្ឌ Serie A និងបានឈ្នះកៅអីទៅលេងក្នុងក្របខ័ណ្ឌ Champions League នារដូវកាលក្រោយ។ Roma បានបញ្ចប់ក្នុងចំណាត់ថ្នាក់លេខ៦ នៅលើតារាងក្របខ័ណ្ឌ Serie A កាលពីរដូវកាលមុន។
បណ្តាញសារព័ត៌មាន Sky Sports បានចេញផ្សាយព័ត៌មានថា កិច្ចសន្យានេះ គឺមានទំហំទឹកប្រាក់៦,០៨លានអឺរ៉ូ ក្នុង១រដូវកាល ក្នុងនោះរាប់បញ្ចូលទាំងប្រាក់ឧបត្ថម្ភនានាផងដែរ។ Dybala បានចំណាយពេលអស់៧ឆ្នាំនៅទីក្រុង Turin ដោយបានស៊ុតបាល់បញ្ចូលទី១១៥គ្រាប់ សម្រាប់ Juventus ប៉ុន្តែ បានជួបបញ្ហារបួសក្នុងរយៈពេល២រដូវកាលចុងក្រោយនេះ៕
ប្រភពព័ត៌មាន៖ Channel News Asia