បរទេស៖ ក្រុម Manchester City ចាំបាច់ត្រូវតែឈ្នះរាល់ការប្រកួតដែលនៅសល់ទាំង៦ក្នុងក្របខ័ណ្ឌ Premier League ដើម្បីការពារពានរបស់ខ្លួន។ នេះបើយោងទៅតាមការបញ្ជាក់របស់លោកគ្រូបង្វឹក Pep Guardiola ខណៈដែលលោកមើលមិនឃើញថា Liverpool អាចនឹងភ្លាត់ស្នៀត នៅមុនពេលបញ្ចប់រដូវកាលនេះឡើយ។
ក្រុម Man City បានវិលទៅកាន់ការនាំមុខ១ពិន្ទុវិញ លើក្រុមហង្សក្រហម ក្នុងការប្រជែងដណ្តើមពាន ខណៈដែលគ្រាប់បាល់ស៊ុតបញ្ចូលទីក្នុងតង់ទី២ ពីកីឡាករ Riyad Mahrez, Phil Foden និង Bernardo Silva បានជួយឲ្យពួកគេដណ្តើមបានជ័យជម្នះក្នុងលទ្ធផល ៣-០ លើក្រុម Brighton នាកីឡដ្ឋាន Etihad។ Liverpool បានយកឈ្នះលើក្រុម Manchester United ក្នុងលទ្ធផល ៤-០ កាលពីថ្ងៃអង្គារ ហើយលោក Guardiola ពិតជាស្ងើចសរសើរដល់ទម្រង់លេងរបស់ក្រុមលោក Jurgen Klopp។
លោក Guardiola បានឲ្យដឹងថា៖ «យើងកំពុងតែប្រជែងជាមួយនឹងក្រុមខ្លាំងមួយក្នុងចំណោមក្រុមខ្លាំងបំផុតក្នុងពិភពលោក។ ពួកគេមានសមត្ថភាពគ្រប់បែបយ៉ាង ហើយនោះគឺជាមូលហេតុដែលការស្ថិតនៅទីនោះជាមួយនឹងពួកគេមានន័យខ្លាំង»។ លោកបានបន្ថែមទៀតថា៖ «វាជារឿងដ៏សាមញ្ញ។ Liverpool នឹងឈ្នះរាល់ការប្រកួតទាំងអស់។ ប្រសិនបើយើងបាត់បង់ពិន្ទុ ពួកគេនឹងក្លាយជាម្ចាស់ជើងឯក ហើយប្រសិនបើយើងឈ្នះរាល់ការប្រកួតទាំងអស់ យើងនឹងក្លាយជាម្ចាស់ជើងឯក»៕
ប្រភពព័ត៌មាន៖ Channel News Asia
