បរទេស៖ ខ្សែការពារ Raphael Varane រកបានគ្រាប់បាល់ជាលើកដំបូងរបស់គេក្នុងក្របខ័ណ្ឌ Premier League ខណៈដែលក្រុមបិសាចក្រហម Manchester United បានវិលទៅកាន់ផ្លូវនៃជ័យជម្នះវិញ តាមរយៈការយកឈ្នះលើក្រុម Brentford ក្នុងលទ្ធផល ៣-០ នៅរាត្រីនៃការលាគ្នាដ៏រំជួលចិត្ត នាកីឡដ្ឋាន Old Trafford។
កីឡាករ Bruno Fernandes និង Cristiano Ronaldo ក៏បានស៊ុតបាល់បញ្ចូលទីផងដែរ កាលពីថ្ងៃចន្ទ ដែលជាការប្រកួតលើទឹកដីខ្លួនឯងជាលើកចុងក្រោយរបស់ក្រុម Man United នៅរដូវកាលដ៏ត្រដាបត្រដួសនេះ។ ខ្សែបម្រើ Juan Mata និងខ្សែការពារ Nemanja Matic ត្រូវបានដាក់ឲ្យចូលលេងក្នុងជម្រើសដំបូង ដោយលោកគ្រូបង្វឹក Ralf Rangnick ខណៈដែលនេះអាចជាការបង្ហាញខ្លួនជាលើកចុងក្រោយរបស់ពួកគេនៅ Old Trafford ស្របពេលដែល Edinson Cavani ដែលក៏ត្រូវបានរំពឹងទុកថា នឹងចាកចេញដែរនោះ ក៏បានចូលលេងក្នុងនាមជាកីឡាករបម្រុងផងដែរ។
Man United នៅតែស្ថិតក្នុងចំណាត់ថ្នាក់លេខ៦ ដោយមាន៥៨ពិន្ទុ ពីការប្រកួត៣៦លើក ដោយដេញតាមពីក្រោយក្រុម Arsenal ៥ពិន្ទុ ប៉ុន្តែ បានលេងការប្រកួតច្រើនជាង២លើក។ ក្រុម Brentford មាន៤០ពិន្ទុ ពីការប្រកួត៣៥លើក ហើយចាំបាច់ត្រូវតែឈ្នះ១លើកទៀត ដើម្បីធានាថា ពួកគេគេចផុតពីការធ្លាក់ក្បែរតំបន់កាត់ចោល៕
ប្រភពព័ត៌មាន៖ Channel News Asia