បរទេស៖ Real Mdrid នឹងបើកការវាយសម្រុកទៅលើក្រុម Manchester City ក្នុងការប្រកួតជើងទី២នៃក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្ររបស់ពួកគេ នាកីឡដ្ឋាន Bernabeu នៅរាត្រីនេះ ខណៈដែលពួកគេសម្លឹងរកការស្រោចស្រង់ការដេញតាមពីក្រោយ១គ្រាប់ ក្រោយពីរងបរាជ័យក្នុងលទ្ធផល ៤-៣ នៅប្រទេសអង់គ្លេស។
នេះបើយោងទៅតាមការបញ្ជាក់របសលោកគ្រូបង្វឹក Carlo Ancelotti។ ខ្សែការពារ David Alaba កំពុងតែមានបញ្ហារបួស ប៉ុន្តែ ខ្សែបម្រើ Casemiro អាចវិលចូលលេងវិញបាន ហើយបើទោះបីមានចម្ងល់ជាច្រើនជុំវិញប្រព័ន្ធលេង និងជម្រើសទាំង១១នាក់ដំបូងក៏ដោយ ប៉ុន្តែ Real នឹងប្រើប្រាស់ទម្រង់លេងបែបវាយសម្រុក ដែលបានផ្តល់គ្រាប់បាល់១១គ្រាប់ ក្នុងការប្រកួតក្របខ័ណ្ឌ Champions League ៤លើកចុងក្រោយរបស់ពួកគេ។
លោក Ancelotti បានប្រាប់សន្និសីទសារព័ត៌មាន កាលពីថ្ងៃចន្ទថា៖ «ប្រសិនបើយើងផ្តោតលើការការពារ និងព្យាយាមការពារ តែផ្នែកខាងក្រោម ជាមួយនឹងកីឡាករ១០នាក់ នៅពីមុខទី Ma City នឹងមានការស៊ុតបាល់៩៩លើក ចំគោលដៅ។ ពេលខ្លះ យើងត្រូវតែមានការប្រថុយប្រឋាន ហើយយើងបានទទួលជោគជ័យនៅរដូវកាលនេះ នៅពេលដែលធ្វើការប្រថុយ ពីព្រោះយើងមានខ្សែប្រយុទ្ធដ៏មុតស្រួចនៅតំបន់ប្រយុទ្ធ»៕
ប្រភពព័ត៌មាន៖ Channel News Asia
