បរទេស៖ លោក Carlo Ancelotti បាននិយាយថា «ប្រវត្តិរបស់ក្លិប» បានជួយឲ្យក្រុម Real Madrid របស់លោក បង្កើតការវាយបកមួយផ្សេងទៀតក្នុងក្របខ័ណ្ឌ Champions League ដើម្បីទម្លាក់ក្រុម Manchester City កាលពីថ្ងៃពុធ និងឈានទៅវគ្គផ្តាច់ព្រ័ត្រ។
ក្រុមម្ចាស់ជើងឯកក្របខ័ណ្ឌកំពូលអឺរ៉ុប១៣សម័យកាលមួយនេះ បានដេញតាមពីក្រោយ ១-០ នៅរាត្រីនោះ និងតាមពីក្រោយទាំង២ជើង ក្នុងលទ្ធផល ៥-៣ ក្នុងវគ្គពាក់កណ្តាលផ្តាច់ព្រ័ត្រ មុននឹងឈានទៅកាន់នាទី ទី៩០ ប៉ុន្តែ កីឡាករ Rodrygo បានស៊ុតបាល់បញ្ចូលទី២គ្រាប់នៅជិតបញ្ចប់ការប្រកួត ហើយគ្រាប់បាល់ប៉េណាល់ទីនៅនាទីបន្ថែម១៥នាទី២ដងរបស់ Karim Benzema បានជួយឲ្យពួកគេទៅវគ្គបន្តតែម្តង។ ក្រុម Real Madrid ក៏បានវាយបកដេញតាមពីក្រោយដើម្បីផ្តួលក្រុម Paris Saint-Germain ក្នុងវគ្គ១៦ក្រុមចុងក្រោយ និងក្រុម Chelsea ក្នុងវគ្គ៨ក្រុមចុងក្រោយផងដែរ។
ក្រោយពីបានក្លាយជាគ្រូបង្វឹកដំបូងគេក្នុងប្រវត្តិសាស្ត្រក្នុងការឈានទៅវគ្គផ្តាច់ព្រ័ត្រ៥លើកនៃយុទ្ធនាការនេះ លោក Ancelotti បានប្រាប់ទូរទស្សន៍ BT Sport ថា៖ «ខ្ញុំមិនអាចនិយាយថា យើងស៊ាំទៅនឹងស្ថានភាពបែបនេះឡើយ ប៉ុន្តែ អ្វីដែលបានកើតឡើងនៅរាត្រីនេះ វាបានកើតឡើងរួចហើយពេលប៉ះ Chelsea និង PSG។ ប្រសិនបើអ្នកត្រូវតែនិយាយពីមូលហេតុ វាគឺប្រវត្តិរបស់ក្លិបនេះ ដែលជួយឲ្យយើងទៅវគ្គបន្ត នៅពេលដែលវាហាក់បង្ហាញថា យើងនឹងត្រូវធ្លាក់»៕
ប្រភពព័ត៌មាន៖ Channel News Asia