គ្រូបង្វឹកក្រុមព្រះខ័នរាជស្វាយរៀង និងណាហ្គាវើលដ៍ គ្រោងផ្តល់ឱកាសឱ្យកីឡាករវ័យក្មេង បានចូលលេង ពេលពួកគេ ត្រូវប្រកួតកាត់សេចក្តីជើងទី២ វគ្គ១៦ក្រុមចុងក្រោយ នៃពានរង្វាន់សម្តេចហ៊ុនសែន លើកទី១៦ ឆ្នាំ២០២២ ជាមួយក្រុមសូលទីឡូអង្គរ និងអាស៊ីអឺរ៉ុប នៅថ្ងៃពុធនេះ។
គ្រូបង្គោលក្រុមណាហ្គាវើលដ៍ លោក ឃីម បូរី ហាក់មិនមានភាពស្ទាក់ស្ទើរនោះទេ ក្នុងការផ្តល់ឱកាសឱ្យកីឡាករវ័យក្មេង ចូលលេង សម្រាប់ការប្រកួតជើងទី២ ជាមួយក្រុមអាស៊ីអឺរ៉ុប នៅរសៀលម៉ោង ៣:៣០ ថ្ងៃពុធនេះ ព្រោះពួកគេ មានគ្រាប់បាល់នាំមុខ ៤-០ លើក្រុមអាស៊ីអឺរ៉ុបរួចទៅហើយ សម្រាប់ការប្រកួតជើងទី១ កន្លងមកនេះ។
លោក ឃីម បូរ៉ា បាននិយាយថា៖ «ការយកឈ្នះលើក្រុមអាស៊ីអឺរ៉ុប ៤-០ កាលពីជើងទី១ វាជាលទ្ធផល លើសការរំពឹងទុក ដោយកីឡាកររបស់យើងធ្វើបានល្អមែនទែន ហើយលទ្ធផលនេះ វាជារឿងល្អ ដែលយើងនឹងអាចដាក់កីឡាករ ដែលមិនបានលេង នៅលីគកំពូល ឱ្យចូលលេងទាំងអស់ នៅក្នុងការប្រកួតជើងទី២នេះ»។
យ៉ាងណាមិញ លោក Conor Nestor មិនដាក់កីឡាករវ័យក្មេងឱ្យចូលលេងច្រើនប៉ុន្មានទេ ព្រោះ ការយកឈ្នះក្រុមសូលទីឡូអង្គរ ត្រឹម ១-០ នាការប្រកួតជើងទី១ នៅលើទឹកដីខេត្តសៀមរាប កន្លងមកនេះ វាមិនទាន់អាចឱ្យក្រុមព្រះខ័នរាជស្វាយរៀង មានភាគរយខ្ពស់ ក្នុងការបានឡើងទៅវគ្គ៨ក្រុមចុងក្រោយ នៅឡើយទេ។
សម្រាប់ការជួបក្រុមសូលទីឡូអង្គរ នៅកីឡដ្ឋានខេត្តស្វាយរៀង នៅល្ងាចម៉ោង ៦:៣០ ថ្ងៃនេះ លោក Conor Nestor បាននិយាយថា៖ «ក្រុមរបស់យើង នឹងដាក់លេងលាយចូលគ្នារវាងកីឡាករក្មេងៗ និង កីឡាករចាស់វស្សា ព្រោះថាកីឡាករមួយចំនួនត្រូវការពេលបង្ហាញខ្លួនលើទីលាន»។
តែទោះបីជាយ៉ាងណា លោក Conor Nestor គិតថា សូលទីឡូអង្គរ បាននឹងកំពុងមានបញ្ហា ទៅលើការសម្រេច ថាតើពួកគេ នៅតែរក្សាទម្រង់លេងបែបចតឡានក្រុង ឬក៏ត្រូវផ្លាស់ប្តូរប្រព័ន្ធលេង ក្នុងការស្វែងរកគ្រាប់បាល់ ខណៈពួកគេ បានចាញ់ នៅជើងទី១ ទៅហើយនោះ។
លោក Conor បាននិយាយថា៖ «ខ្ញុំគិតថាស្ទីលលេងរបស់សូលទីឡូអង្គរ សម្របទៅនឹងតាក់ទិករបស់ក្រុមជម្រើសជាតិនាពេលថ្មីៗនេះ គឺពិតណាស់ថា ពួកគេខិតខំប្រឹងប្រែង ដើម្បីលេងស្ទីលបែបនេះ។ យ៉ាងណាក្ដី ពេលអ្នកចាញ់ ១-០ រួចហើយនៅជើងទី១ តើនៅតែរក្សាការការពារ និង វាយបក ឬ ត្រូវផ្លាស់ប្ដូរតាក់ទិក ដើម្បីឈ្នះការប្រកួតនេះ? ខ្ញុំគិតថា ជាបញ្ហាដែលពួកគេត្រូវតែដោះស្រាយ»។
ដោយឡែក ក្រុមវិសាខា ត្រូវស្វាគមន៍ក្រុម សៀមរាបអេហ្វស៊ី នៅម៉ោង ៣:៣០ ថ្ងៃពុធនេះដែរ ស្របពេលក្រុមបឹងកេត ត្រូវជួបក្រុមភ្ញៀវ អាយអេសអាយដង្កោសែនជ័យ ក្នុងពេលនេះដូចគ្នា ខណៈការប្រកួតជើងទី១ កន្លងមកនេះ ក្រុមវិសាខា បានលត់ក្រុមសៀមរាប ៦-០ ហើយបឹងកេត បានឈ្នះក្រុមអាយអេសអាយដង្កោសែនជ័យ ២-០៕
