ទិត្យ សុវណ្ណគិរី ឈ្នះពិល រ័ត្ន បានឱកាសបន្តទៅជុំទី២ ពានរង្វាន់ TV5

អ្នកប្រដាល់គុនខ្មែរ ទិត្យ សុវណ្ណគិរី បានឈ្នះពិល រ័ត្ន បានឱកាសបន្តទៅជុំទី២ ពានរង្វាន់ TV5 ទម្ងន់ ៦០គីឡូក្រាម ប៉ុន្តែការចាញ់ឈ្នះហាក់មិនសូវអស់ចិត្តដូចគ្នាកាលពីថ្ងៃសៅរ៍ ទី៧ ខែកញ្ញា ២០១៩។ អ្នកទាំងពីរខាងលើនេះ វ៉ៃហាក់នៅញញើតគ្នាទៅវិញទៅមក ដោយឆ្មក់ទាត់ និងឆ្មក់កណ្ដាប់ដៃមួយៗប៉ុណ្ណោះក្នុងទឹកទី១។

ចូលដល់ទឹកទី២ ពួកគេក៏នៅមិនសូវជាហ៊ានប្ដូរខ្លាំងនោះដែរ ប៉ុន្តែឃើញ ពិល រ័ត្ន ព្យាយាមចេញអាវុធច្រើន ទោះត្រូវខ្លះខុសខ្លះក៏ដោយ។ ចុងទឹកទី២ សល់ត្រឹម៥០វិនាទីចុងក្រោយ ទិត្យ សុវណ្ណគិរី បោះជង្គង់ពីចម្ងាយលើ ពិល រ័ត្ន ហើយប៉ើងទៅក្បែរខ្សែសង្វៀន រួចក៏បែរគូថដាក់កូនសិស្សលោក អេ ភូថង ខណៈពេលនោះសិស្សគុនរូបនោះបក់កែងបញ្ឆិតពីក្រោយធ្វើឲ្យដៃគូដួលមិនអាចបន្តការប្រកួតទៀតឡើយ។

ពិល រ័ត្ន អាចនិងគិតថាដៃគូរបស់ខ្លួនវ៉ៃខុសបច្ចេកទេស ប៉ុន្តែចុងក្រោយចៅក្រម អាជ្ញាកណ្ដាលបានពិភាក្សាគ្នាហើយក៏សម្រេចឲ្យ ទិត្យ សុវណ្ណគិរី ជាអ្នកឈ្នះបានឡើងទៅជុំទី២ ពេលនោះតែម្ដងទៅ។