ក្រុម Sevilla កាន់តែមានភាពច្បាស់លាស់ក្នុងការឈ្នះកៅអីទៅលេងក្នុងក្របខ័ណ្ឌ Champions League នៅរដូវកាលក្រោយ ក្រោយពីបានផ្តួលក្រុម Real Mallorca ក្នុងលទ្ធផល ២-០ កាលពីថ្ងៃអាទិត្យ។
កីឡាករ Lucas Ocampos បានស៊ុតបាល់ប៉េណាល់ទីនៅពាក់កណ្តាលតង់ទី១ នៅមុនពេល Youssef En-Nesyri បានបន្ថែមគ្រាប់បាល់ទី២ នៅជិតបញ្ចប់ការប្រកួត ដើម្បីជួយឲ្យក្រុម Sevilla នាំមុខ៩ពិន្ទុដាច់លើក្រុមឈរលេខ៥ Villarreal។ ខណៈដែលនៅសល់ការប្រកួតត្រឹមតែ៣លើកទៀត និងការមានប្រៀបពីជំនួបរវាងក្រុមទាំង២ ក្រុម Villarreal មិនទាន់អស់ឱកាសក្នុងការប្រជែងដណ្តើមយកកៅអីឡើយ ប៉ុន្តែ ពួកគេត្រូវតែដណ្តើមឲ្យបាន៩ពិន្ទុពេញ ហើយក្រុម Sevilla ត្រូវតែចាញ់ការប្រកួតដែលនៅសល់ទាំង២លើករបស់ខ្លួន។
ខ្សែបម្រើ Fernando Reges របស់ក្លិប Sevilla បានឲ្យដឹងថា៖ «ការឈ្នះកៅអីក្នុងក្របខ័ណ្ឌ Champions League គឺជាគោលបំណងរបស់យើង។ យើងកំពុងតែខិតកាន់តែកៀក ហើយពេលនេះយើងនៅសល់តែប៉ុន្មានជំហានប៉ុណ្ណោះ ដើម្បីសម្រេចគោលបំណងរបស់យើង»។ ការបញ្ចប់ក្នុងចំណាត់ថ្នាក់កំពូលទាំង៤ នឹងកា្លយជាសមិទ្ធិផលដ៏គួរឲ្យចាប់អារម្មណ៍មួយសម្រាប់ក្រុម Sevilla និងគ្រូបង្វឹករបស់ពួកគេគឺលោក Julen Lopetegui ដែលបានចូលកាន់តំណែងកាលពីឆ្នាំមុន ក្រោយពីការជួបសុបិនអាក្រក់ក្នុងពេលដឹកនាំក្រុមជម្រើសជាតិអេស្ប៉ាញ និង Real Madrid៕
ប្រភពព័ត៌មាន៖ Channel News Asia
