បរទេស៖ ក្លិប Fenerbahce កំពុងតែចុះហត្ថលេខាជាមួយនឹងខ្សែបម្រើអាល្លឺម៉ង់ Mesut Ozil វ័យ៣២ឆ្នាំ ដែលនឹងត្រូវបញ្ចប់រយៈពេល៨ឆ្នាំរបស់គេជាមួយនឹងក្លិប Arsenal របស់ក្របខ័ណ្ឌ Premier League។
នេះបើយោងទៅតាមការប្រកាសរបស់ក្លិបតួកគីមួយនេះ កាលពីថ្ងៃអាទិត្យ។ Ozil បានបញ្ជាក់កាលពីពេលមុននេះថា រូបគេពិតជារំភើបណាស់ក្នុងការលេងឲ្យអតីតក្រុមម្ចាស់ជើងឯករបស់តួកគីមួយនេះ ហើយថា រូបគេមានភាពរឹងមាំគ្រប់គ្រាន់ហើយ បើទោះបីខកខានលេងកីឡាបាល់ទាត់ជិតរយៈពេល១ឆ្នាំក៏ដោយ។ រូបគេមិនធ្លាប់បាន់លេងឲ្យក្រុម Arsenal សោះបើគិតចាប់តាំងពីខែមីនា និងត្រូវបានលុបឈ្មោះចេញទាំងក្នុងក្រុមដែលត្រូវលេងក្នុងក្របខ័ណ្ឌ Premier League និង Europa League នៅរដូវកាលនេះ។ Ozil ត្រូវបានទាក់ទងជាមួយនឹងការផ្ទេរមួយទៅកាន់ក្លិប Fenerbahce ដែលជាក្លិបដ៏ជោគជ័យបំផុតលំដាប់ទី២របស់តួកគី ជាយូរមកហើយ ខណៈដែលក្លិប បានបញ្ជាក់កាលពីថ្ងៃអាទិត្យថា៖ «ក្លិបរបស់យើងនឹងនាំយក Mesut Ozil ទៅកាន់ទីក្រុង Istanbul ដើម្បីបន្តដំណើរការនៃការផ្ទេរនេះ»។
ក្នុងពេលផ្តល់សម្ភាសន៍ទៅកាន់ទូរទស្សន៍ NTV របស់តួកគី Ozil ដែលជាប់ខ្សែលោហិតជាជនជាតិតួកគីនោះ បានបញ្ជាក់ថា រូបគេកំពុងតែស្រេកឃ្លានក្នុងការលេងឲ្យក្លិប Fenerbahce មុននឹងបន្ថែមថា រូបគេនឹងធ្វើដំណើរទៅដល់ទីក្រុង Istanbul នៅថ្ងៃព្រឹកថ្ងៃចន្ទនេះ ដើម្បីបំពេញការផ្ទេររបស់គេ៕
ប្រភពព័ត៌មាន៖ Channel News Asia
