បរទេស៖ ខ្សែប្រយុទ្ធ Romelu Lukaku បាននិយាយថា Chelsea គឺជា «អ្នកប្រមាញ់» របស់ Manchester City ក្នុងការប្រជែងដណ្តើមពាន ក្រោយពីបានចូលលេងក្នុងនាមជាកីឡាករបម្រុងដើម្បីស៊ុតបាល់បញ្ចូលទីជាលើកដំបូងក្នុងក្របខ័ណ្ឌ Premier League បើគិតចាប់តាំងពីខែកញ្ញា ដើម្បីជួយឲ្យក្រុមខ្លួនផ្តួលក្រុម Aston Villa ក្នុងលទ្ធផល ៣-១។
ការធ្វើឲ្យបាល់ចូលទីខ្លួនឯងរបស់ Reece James បានជួយឲ្យក្រុម Aston Villa មានគ្រាប់បាល់នាំមុខមុន ប៉ុន្តែ Jorginho បានរកគ្រាប់បាល់តាមស្មើវិញភ្លាមៗ ពីការស៊ុតបាល់ប៉េណាល់ទី ក្នុងការប្រកួតមួយរវាងក្រុម២ ដែលរងគ្រោះដោយសារតែករណីឆ្លងកូវីដ ១៩ ដូចគ្នា។ Lukaku គឺជាកីឡាករម្នាក់ក្នុងចំណោមកីឡាកររបស់ Chelsea ដែលបានអវត្តមាន ដោយសារតែឆ្លងកូវីដ ១៩ ក្នុងពេលក្រុមតោខៀវ ទទួលបានលទ្ធផលស្មើ ០-០ ជាមួយនឹងក្រុម Everton និង Wolves កាលពីសប្តាហ៍មុន ដែលនាំឲ្យពួកគេឃ្លាតឆ្ងាយពីការប្រជែងពាន។ ប៉ុន្តែ រូបគេបានវិលចូលលេងវិញនៅតង់ទី២ និងបានបង្កើតឲ្យមានឥទ្ធិពលភ្លាមៗ ដើម្បីតែតបាល់បញ្ចូលទីយ៉ាងល្អ ក្រោយពីការបញ្ជូនបាល់ឆ្លងរបស់ Callum Hudson Odoi។ បន្ទាប់មក តារាឆ្នើមអន្តរជាតិបែលហ្ស៊ិករូបនេះ បានជួយឲ្យ Chelsea ទទួលបាល់ប៉េណាល់ទីជាលើកទី២ នៅជិតបញ្ចប់ការប្រកួត ខណៈដែល Jorginho បានស៊ុតបាល់បំប៉ោងសំណាញ់ទីតែម្តង។
Lukaku បានឲ្យដឹងថា៖ «ខ្ញុំត្រូវការទម្រង់លេងបែបនេះនៅថ្ងៃនេះ»។ ស្របពេលជាមួយគ្នា Manchester City បានលត់ក្រុម Leicester City យ៉ាងចាស់ដៃក្នុងលទ្ធផល ៦-៣ កាលពីថ្ងៃសៅរ៍ ស្របពេលដែលក្រុម Arsenal បានយកឈ្នះលើក្រុម Norwich ៥-០៕
ប្រភពព័ត៌មាន៖ Channel News Asia
