បរទេស៖ លោក Ralf Rangnick អ្នកចាត់ការទូទៅបណ្តោះអាសន្នរបស់ក្លិប Manchester United បានសម្តែងការមិនសប្បាយចិត្តចំពោះទម្រង់លេងដ៏ទន់ខ្សោយរបស់ក្រុមខ្លួន ក្នុងពេលទទួលបានលទ្ធផលស្មើ ១-១ ជាមួយនឹងក្រុម Newcastle United ក្នុងក្របខ័ណ្ឌ Premier League កាលពីថ្ងៃចន្ទ។
ក្រុម Newcastle បានខ្ជះខ្ជាយឱកាសជាច្រើន ហើយការបង្ហាញពីទម្រង់លេងយ៉ាងល្អរបស់អ្នកចាំទី David De Gea បានការពារមិនឲ្យលោក Rangnick រងបរាជ័យជាលើកដំបូងក្នុងនាមជាគ្រូបង្វឹករបស់ Manchester United។ ស្របពេលដែលលោកបានបន្តការមិនស្គាល់ចាញ់រហូតដល់៤ប្រកួតក្នុងរាល់យុទ្ធនាការទាំងអស់ គ្រូបង្វឹកសញ្ជាតិអាល្លឺម៉ង់រូបនេះបានប្រាប់ Sky Sports ថា៖ «ខ្ញុំមិនពេញចិត្តនឹងទម្រង់លេងឡើយ។
ថ្ងៃនេះ យើងមិនបានគ្រប់គ្រងការប្រកួតតាំងពីដើមទីឡើយ។ វាអាស្រ័យទៅលើថាមពល ភាពរឹងមាំ និងការស្រេកឃ្លាន។ នៅតំបន់ទាំងនេះ យើងលេងមិនបានល្អសោះ។ រឿងដែលល្អគឺថា យើងទទួលបាន១ពិន្ទុ ប៉ុន្តែ ទម្រង់លេងត្រូវតែល្អប្រសើរជាងនេះ»៕
ប្រភពព័ត៌មាន៖ Channel News Asia
